10 кастрычніка, Магілёў /Сяргей Кулягін - БЕЛТА/. Моладзь Беларусі і Расіі гатова стаць правадніком ідэй саюзнай інтэграцыі. Аб гэтым заявіў сёння міністр адукацыі Беларусі Ігар Карпенка на адкрыцці форуму "Моладзь - за Саюзную дзяржаву", які праходзіць у Магілёве ў рамках V Форуму рэгіёнаў Беларусі і Расіі, перадае карэспандэнт БЕЛТА.
Паводле слоў міністра, моладзь гатова прыняць эстафету ў старэйшага пакалення, укараняць сучасныя інавацыйныя праекты ў розных сферах дзяржаўнага і грамадскага развіцця. У гэтым ён пераканаўся ў час сустрэчы і адкрытага дыялогу з моладдзю ў фармаце форуму.
"Маладым людзям усё часцей даводзіцца сутыкацца з выклікамі, якія дыктуе сучасны свет. Менавіта таму для нас вельмі важна захаваць тыя даверныя, брацкія адносіны, якія ідуць каранямі ў нашу агульную гісторыю, а традыцыі беражліва перадаюцца з пакалення ў пакаленне", - адзначыў Ігар Карпенка.
Ён падкрэсліў, што сённяшняя моладзь аб'яднана імкненнем дабіцца поспеху, захоплена сваёй справай, з'яўляецца той стваральнай сілай, якая будуе і развівае Саюзную дзяржаву, садзейнічае дынамічнаму развіццю і працвітанню дзвюх краін. "Я лічу найбольш важным на цяперашнім форуме прадэманстраваць адзінае імкненне моладзі да супрацоўніцтва на шляху дасягнення агульных мэт. Наглядна паказаць усім, як важны мір і ўзаемаразуменне, традыцыйныя маральныя каштоўнасці, дружба і гасціннасць, грамадская стабільнасць і ўзаемная згода, а раз'яднанасць, варожасць і недавер параджаюць агрэсію і страх перад будучым", - сказаў міністр.
"Таму сёння, калі ў свеце існуюць шматлікія пагрозы палітычныя, інфармацыйныя, эканамічныя і нават ваенныя, такія сустрэчы адыгрываюць асаблівую ролю для стабільнасці ў грамадстве, сусветным суіснаванні, - падкрэсліў Ігар Карпенка. - Моладзь сваім стаўленнем да саюзнага будаўніцтва ўжо цяпер закладвае асновы яго будучага. Мы цэнім вашы здольнасці і актыўную жыццёвую пазіцыю, настроенасць на важныя і патрэбныя для нашых дзяржаў канструктыўныя справы".
Міністр адукацыі пажадаў моладзі плённай і эфектыўнай работы. "Гэты форум, падпісаныя на ім пагадненні аб рэгіянальным узаемадзеянні нададуць новы імпульс развіццю маладзёжнага супрацоўніцтва дзвюх краін", - выказаў упэўненасць Ігар Карпенка.-0-
