9 снежня, Мінск /Кар. БЕЛТА/. Мокры снег і мяцеліцу прагназуюць сіноптыкі ў выхадныя 10 і 11 снежня, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У Белгідрамеце адзначылі, што ў суботу франтальны раздзел, цэнтр якога знаходзіцца над Украінай, будзе перамяшчацца праз тэрыторыю Беларусі, таму на большай частцы краіны пройдзе снег. "У паўднёва-ўсходніх раёнах будзе пераважаць снег і дождж. У начны час месцамі па Брэсцкай вобласці, а ў дзённы ў многіх паўднёва-ўсходніх раёнах краіны чакаюцца моцныя ападкі - снег, мокры снег. Па Гомельскай вобласці яны будуць ісці ў выглядзе мокрага снегу і дажджу. Раніцай і ўдзень месцамі па краіне чакаецца наліпанне мокрага снегу", - растлумачылі ў цэнтры.
У нядзелю ўначы тэрыторыя Беларусі будзе знаходзіцца ў асноўным у полі паніжанага атмасфернага ціску, таму лакальна пройдзе кароткачасовы снег. Раніцай і ўдзень краіна трапіць пад уплыў паўночнай перыферыі паўднёвага цыклону, які будзе перамяшчацца з Балканскага паўвострава на цэнтральныя раёны Расіі. "У Беларусі прагназуюцца складаныя ўмовы надвор'я, звязаныя з ападкамі, - мокрым і звычайным снегам, дажджом, месцамі па краіне чакаецца моцны снег, наліпанне мокрага снегу і мяцеліца. Таксама вецер будзе ўзмацняцца парывамі да 15-20 м/с, месцамі захаваецца галалёдзіца", - расказалі ў Белгідрамеце.
Сіноптыкі ў сувязі з галалёдам і моцным ветрам рэкамендуюць па магчымасці заставацца дома, а аўтамабілістам - быць акуратней за рулём ці ж зусім адмовіцца ад паездак.-0-