Прыёмы грамадзян - паказальная і, несумненна, эфектыўная форма работы з грамадзянамі. Людзі прыходзяць са сваімі набалелымі, часта закаранелымі праблемамі, якія гадамі не вырашаюцца. Спрабуючы дастукацца, дайсці да сутнасці, вырашыць пытанне на сваю карысць, яны звяртаюцца да прадстаўнікоў улады рознага ўзроўню. Напярэдадні ў Браслаўскім раённым выканаўчым камітэце асабісты прыём грамадзян і юрыдычных асоб правёў старшыня Палаты прадстаўнікоў Нацыянальнага сходу, упаўнаважаны прадстаўнік кіраўніка дзяржавы ў Віцебскай вобласці Ігар Сергяенка. Карэспандэнты БЕЛТА прысутнічалі там жа.
У цэлым па вобласці
Спачатку аб назіраннях. Многія пытанні могуць вырашыць мясцовыя органы ўлады на сваім узроўні. І трэба аддаць належнае - вырашаюць. Аднак ёсць пытанні (цяпер мы ў некаторай ступені выходзім за рамкі праведзенага ў Браславе прыёму грамадзян), якія патрабуюць разгляду на абласным, рэспубліканскім узроўнях.
Напрыклад, на прыёмах грамадзян у раёнах Віцебскай вобласці задаюць пытанне аб якасці пітной вады. Неабходна палепшыць работу грамадскага транспарту, перагледзець маршруты. Часта задаюць пытанні аб павелічэнні электраспажывання ў бытавых мэтах. І многія з гэтых пытанняў патрабуюць дадатковага фінансавання. Урэшце, работа праводзіцца. Што датычыцца, напрыклад, першай названай тут тэмы, варта нагадаць, у прыватнасці, пра будаўніцтва станцый ачысткі вады ад прымесей жалеза.
Вернемся да прыёму грамадзян у Браславе. У некаторых разгледжаных пытаннях кропка не пастаўлена, але гэта і добра: у грамадзян застаецца надзея, што пытанне будзе вырашана максімальна ўдачна для іх.
Справы зямельныя
Напрыклад, пенсіянер, мясцовы жыхар, разлічвае вырашыць зямельнае пытанне. Ён жыве ў прыватным доме ў адной з дзвюх кватэр. Усё б нічога, ды мяжа паміж сумежнымі зямельнымі ўчасткамі праходзіць па фундаментах жылых дамоў, адпаведна ў суседзяў узнікаюць пытанні ў абслугоўванні домаўладанняў. Сутнасць пытання зводзілася да таго, як можна змяніць межы зямельных участкаў.
Здавалася б, сітуацыя тупіковая. Тым больш судовыя рашэнні ўжо ёсць. Аднак на прыёме высветлілася, што пенсіянер ужо звяртаўся да мясцовых улад і выйсце знойдзена. Суседзям прапануецца перадаць адзін аднаму частку сваёй зямлі для абслугоўвання дома. Вырашана, што райвыканкам прапрацуе тэму, запросіць суседа заяўніка на гутарку, па выніках якой будзе прынята нейкае рашэнне. Заяўніка такі варыянт задавольвае.
Між тым падобных пытанняў у час прыёмаў грамадзян апошнім часам стала менш, заўважыў Ігар Сергяенка. Так, іх дазваляе рэгуляваць Кодэкс аб зямлі. Дзейнічае зямельная амністыя. Больш таго, абмяркоўваецца тэма прадаўжэння яе тэрміну.
Справы мабільныя
Другі заяўнік з вёскі Крывасельцы Браслаўскага раёна, дзе ён развівае турызм, расказаў аб праблемах з сувяззю і інтэрнэтам.
Паводле слоў Ігара Сергяенкі, для Браслаўскага раёна і для краіны пытанне не новае, ім ужо займаюцца. Летам Палата прадстаўнікоў праводзіла комплексны аналіз гэтай тэмы ў цэлым па краіне. Інфармацыя накіравана ў Міністэрства сувязі і інфарматызацыі. Распрацавана праграма па ўсіх рэгіёнах на гэты і наступны гады.
Вяртаючыся мысленна гадоў на 15-20 гадоў таму, калі з'явіліся сотавыя тэлефоны, успамінаецца, што сувязь тады працавала толькі ў абласных гарадах, потым з'явілася ў райцэнтрах. Сёння людзі настолькі прывыклі да камфорту гэтага віду сувязі, што хочуць быць у доступе ў любым пункце краіны, на любым хутары. І каб мабільны інтэрнэт там быў.
Упаўнаважаны прадстаўнік кіраўніка дзяржавы ў Віцебскай вобласці адзначыў, што ў адзін момант гэтага не зробіш. "Але да гэтага трэба ісці - да гэтага і ідзём", - сказаў ён.
Пенсійныя гарантыі ветэранам-афганцам
На прыём грамадзян прыйшоў былы воін-афганец, які на працягу доўгага перыяду часу не ведаў аб тым, што можа звярнуцца ў органы сацыяльнай абароны насельніцтва за атрыманнем надбаўкі да пенсіі. Сёння ён гэту надбаўку атрымлівае, але ставіць пытанне аб тым, каб ажыццявілі пераразлік і кампенсавалі выплаты за ўвесь мінулы перыяд.
Паводле слоў заяўніка, аб павышэнні да пенсіі даведаўся выпадкова, віншуючы старога знаёмага са святамі. Калі пенсіянер стаў цікавіцца, яму расказалі, што даплата назначаецца па заяўным прынцыпе. Наракае, што ніхто яго своечасова не сарыентаваў і не падказаў. Сам ён "просты вясковы хлопец", інтэрнэтам не карыстаецца.
Ігар Сергяенка ўпэўнены, што такая сітуацыя сведчыць аб недапрацоўках тых людзей, якія павінны непасрэдна гэтым займацца.
Як растлумачылі спецыялісты, гэтай катэгорыі пенсіянераў надбаўка да пенсіі ўстанаўліваецца з наступнага пасля прадстаўлення дакументаў месяца. Раней заяўніку рэкамендавалі звярнуцца ў суд. У ліпені суд Браслаўскага раёна пастанавіў пакінуць рашэнне камісіі па назначэнні пенсій у сіле. Апеляцыйную скаргу разглядаў Віцебскі абласны суд, які рашэнне ніжэйстаячага суда пакінуў без змянення.
Па сутнасці, усе інстанцыі пройдзены. Застаецца звяртацца ў Вярхоўны суд, што пенсіянер і зробіць. Бо даплата да пенсіі істотная. Інвалідам III групы - 250 працэнтаў мінімальнага памеру пенсіі па ўзросце, або на гэты момант больш за Br270.
Старшыня Палаты прадстаўнікоў дадаў, што з гэтым пытаннем пастараецца разабрацца і на рэспубліканскім узроўні.
Знізіць памер штрафу
Пенсіянер, заслужаны меліяратар прыйшоў на прыём, як ён сам адзначыў, змыць ганебную пляму. Некалькі гадоў таму, ва ўзросце старэйшым за 70 гадоў, на наступны дзень пасля застолля сеў за скутар. На дарозе яго спыніў супрацоўнік ДАІ і склаў пратакол за язду ў нецвярозым выглядзе. Сёння мужчына не згодны з памерам штрафу.
У РАУС растлумачылі, што пакаранне не прадугледжвала варыятыўнасць: 5 гадоў пазбаўлення права кіравання транспартным сродкам і штраф у памеры 200 БВ, што складала на той момант Br5,8 тыс. Нейкай вілкі ў гэтым выпадку прымяніць не ўяўлялася магчымым, бо алкагольнае ап'яненне склала больш за 0,8 праміле.
У падобных выпадках правільна заўважаюць: закон для ўсіх аднолькавы. Аднак і ў гэтым выпадку мясцовая ўлада гатова дапамагчы чалавеку. Службе прымусовага выканання прапануюць расцягнуць плацеж на больш доўгі перыяд, што дазволіць знізіць штомесячную нагрузку на чалавека.
Няма невырашальных праблем
Старшыня Браслаўскага раённага выканаўчага камітэта Вячаслаў Грышчанка ў каментарыі карэспандэнту БЕЛТА адзначыў, што большасць агучаных у час прыёму грамадзян праблем магчыма вырашыць на мясцовым узроўні. "Мы разумеем, што пытанні былі, ёсць і будуць. Аб тым, наколькі эфектыўна ўлада іх вырашае, сведчыць той факт, ідуць людзі з гэтымі праблемамі ў вышэйстаячыя органы ці не. Усё, што можам вырашыць на мясцовым узроўні, мы і вырашаем", - сказаў ён.
Вячаслаў Грышчанка заўважыў, што праводзімая райвыканкамам работа - і асабістыя прыёмы, і прамыя тэлефонныя лініі - дазваляе людзям на першапачатковым этапе агучваць праблемы, а ўладам - ставіць гэтыя тэмы на кантроль, даваць даручэнні і вырашаць. "Мы адкрытыя. Калі ў чалавека ёсць праблема - яна вырашаецца", - падкрэсліў ён.
БЕЛТА.-0-
Падпісвайцеся на нас у
