20 лістапада, Мінск /Кар. БЕЛТА/. Мяцеліца, да мінус 15 градусаў і галалёдзіца прагназуюцца ў Беларусі з 21 па 26 лістапада. Аб гэтым паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Апошні асенні месяц, перасягнуўшы свой каляндарны экватар, упэўнена ўступае ў пару перадзім'я, час, калі халодныя паветраныя масы паўночных шырот пачынаюць пераважаць над цёплымі. Паводле апошніх даных, сярэднясутачная тэмпература паветра па краіне знаходзіцца ў межах ад мінус 7 градусаў да плюс 1 градуса, што на 1-8 градусаў ніжэй за норму па календары. Зімовы характар надвор'я захаваецца ў Беларусі ў першай палове гэтага тыдня", - расказалі ў Белгідрамеце.
У аўторак, 21 лістапада, чакаецца без істотных ападкаў, толькі ў паўднёва-заходніх раёнах краіны месцамі пройдзе снег, мокры снег. На асобных участках дарог утворыцца галалёдзіца. Тэмпература паветра ўначы складзе мінус 5-11 градусаў, а па паўднёвым захадзе - мінус 1-4 градусы. Удзень тэмпература панізіцца да 0 - мінус 6 градусаў.
У сераду, 22 лістапада, будзе пераважна без ападкаў. На асобных участках дарог галалёдзіца. Уначы тэмпература паветра панізіцца да мінус 5-11 градусаў, пры праясненнях - да мінус 15 градусаў. Удзень прагназуецца мінус 1-7 градусаў.
Паводле інфармацыі сіноптыкаў, у другой палове тыдня сітуацыя пачне мяняцца. Атлантыка адправіць на кантынент цыкланічны віхор і пад уплывам яго атмасферных франтоў павялічыцца і ўшчыльніцца воблачнасць, а на змену халодным арктычным паветраным прыйдзе цёплая паветраная маса атлантычнага паходжання.
У чацвер, 23 лістапада, уначы пераважна па паўночна-заходняй палове, раніцай і ўдзень на большай частцы тэрыторыі краіны пройдуць ападкі (снег, мокры снег, удзень па заходняй палове з дажджом), раніцай і ўдзень месцамі па паўночным усходзе прагназуецца моцны снег, мокры снег. У асобных раёнах чакаецца мяцеліца, наліпанне мокрага снегу, на дарогах галалёдзіца, удзень па захадзе слабы галалёд. Уначы па паўночным захадзе, раніцай і ўдзень у многіх раёнах вецер узмоцніцца да 15-20 м/с. Тэмпература паветра ўначы будзе вагацца ад мінус 5 да мінус 11 градусаў, пры праясненнях - да мінус 15 градусаў, а ўдзень - ад мінус 3 градусаў па ўсходзе да плюс 5 градусаў па захадзе.
У пятніцу, 24 лістапада, часам прагназуюцца ападкі (мокры снег, дождж). Месцамі слабы галалёд, на асобных участках дарог галалёдзіца. Уначы на большай частцы, удзень месцамі парывы ветру дасягнуць 15-20 м/с. Тэмпература паветра на працягу сутак будзе вагацца ад мінус 2 да плюс 4 градусаў, а ўначы па ўсходзе - да мінус 4 градусаў. Удзень па паўднёвым захадзе чакаецца да плюс 7 градусаў.
У Белгідрамеце адзначылі, што ў гэтыя выхадныя характар надвор'я ў Беларусі па-ранейшаму будзе няўстойлівы.
У суботу, 25 лістапада, часам пройдуць ападкі (мокры снег, дождж). Месцамі слабыя туман і галалёд, на асобных участках дарог галалёдзіца. Уначы будзе ад мінус 4 да плюс 3 градусаў, а ўдзень - ад мінус 2 да плюс 5 градусаў.
У нядзелю, 26 лістапада, часам будзе ісці снег, мокры снег. На дарогах месцамі ўтворыцца галалёдзіца. Уначы слупкі тэрмометра пакажуць 0 - мінус 7 градусаў, а пры праясненнях - да мінус 10 градусаў. Удзень сіноптыкі абяцаюць мінус 5 - плюс 2 градусы.-0-
