24 кастрычніка, Мінск /Кар. БЕЛТА/. Школьная медыяцыя садзейнічае станаўленню дзяцей як адказных і канструктыўных членаў грамадства, заявіў намеснік кіраўніка Адміністрацыі Прэзідэнта Беларусі, старшыня Саюза юрыстаў Валерый Міцкевіч на круглым стале ў Мінску, перадае карэспандэнт БЕЛТА.
Пілотны праект беларускай школьнай медыяцыі пад дэвізам "Вучымся разумець адзін аднаго" развіваецца з 2015 года пад эгідай Саюза юрыстаў. Ён быў пачаты цэнтрам "Медыяцыя і права" ў адной са сталічных школ. З кожным годам да яго далучаецца ўсё больш устаноў адукацыі па ўсёй краіне. На думку Валерыя Міцкевіча, медыяцыя ў школах з'яўляецца цікавым і карысным інструментам у практыцы работы дзяржаўнай сістэмы адукацыі.
Унутраныя канфлікты і крыўды, якія сфарміраваліся ў перыяд вучобы ў школе або інстытуце, могуць мець латэнтны характар. І без своечасовага выяўлення і ўстаранення яны патэнцыяльна могуць не проста ўскладніць адносіны чалавека, але і праявіцца ў негатыўных рысах характару, выкліканых імі жыццёвых неладах. У сувязі з гэтым на выкарыстанне працэдур медыяцыі ў школах ускладаюцца асаблівыя надзеі, адзначыў старшыня Саюза юрыстаў.
Паспяховае прымяненне медыяцыі ў навучальных установах не толькі садзейнічае наладжванню нармальных сацыяльных адносін паміж вучнямі, бацькамі, педагогамі, але і можа добра паўплываць на пошук дзецьмі і падлеткамі свайго месца ў калектыве і станаўленне ў будучым іх як адказных і канструктыўных членаў грамадства, дадаў Валерый Міцкевіч.
Яшчэ некалькі гадоў таму ў Беларусі аб медыяцыі гаварылі толькі як аб перадавым вопыце ў сферы ўрэгулявання канфліктаў з дапамогай трэцяга нейтральнага боку, шырока распаўсюджаным у краінах далёкага замежжа. Аднак пасля прыняцця адпаведнага закона ў рэспубліцы ёсць гэты рэальна дзеючы інстытут. Медыяцыя дае грамадзянам і суб'ектам гаспадарання магчымасць без звароту ў суд хутка, канфідэнцыяльна і, што самае галоўнае, добраахвотна знайсці ўзаемавыгаднае рашэнне. Гэты падыход можа паспяхова прымяняцца для вырашэння гаспадарчых, сямейных, працоўных, карпаратыўных і іншых грамадзянска-прававых канфліктаў, ён садзейнічае наладжванню канструктыўных адносін і атмасферы ўзаемаразумення ва ўсіх сферах грамадскага жыцця.
Удзельнікамі круглага стала "Беларуская школьная служба медыяцыі: уплыў на адукацыйны працэс і тэндэнцыі развіцця ў Рэспубліцы Беларусь" сталі прадстаўнікі зацікаўленых дзяржаўных органаў і арганізацый, у тым ліку педагогі, медыятары і адвакаты. Яго арганізатарамі выступілі Міністэрства юстыцыі сумесна з прадстаўніцтвам Дзіцячага фонду ААН у Беларусі, грамадскім аб'яднаннем "Беларускі рэспубліканскі саюз юрыстаў" і вучэбна-практычнай установай "Цэнтр "Медыяцыя і права".-0-
