8 красавіка, Мінск /Кар. БЕЛТА/. У Беларусі неабходна сфарміраваць выразную і канкрэтную стратэгію лічбавізацыі ўсіх галін і краіны ў цэлым. Аб гэтым заявіў міністр сувязі і інфарматызацыі Канстанцін Шульган сёння на адкрыцці XXVI Міжнароднага форуму па інфармацыйна-камунікацыйных тэхналогіях "ТІБО", перадае карэспандэнт БЕЛТА.
"У 2018 годзе Прэзідэнтам Беларусі пастаўлены шэраг новых задач па паскарэнні эканамічнага развіцця і павышэнні ўзроўню жыцця насельніцтва на базе лічбавай трансфармацыі. Узрасла роля Міністэрства сувязі і інфарматызацыі як стратэгічнага штаба па развіцці лічбавых тэхналогій у маштабах усёй краіны. Гэта "Індустрыя 4.0" у прамысловасці, дакладнае земляробства ў сельскай гаспадарцы, а таксама стварэнне паўнацэннай сістэмы электроннай медыцыны і адукацыі. Неабходна сфарміраваць выразную, зразумелую і канкрэтную стратэгію лічбавізацыі ўсіх галін і краіны ў цэлым", - адзначыў Канстанцін Шульган.
Паводле слоў міністра, форум "ТІБО-2019" прызначаны ўнесці свой уклад у вырашэнне пастаўленых задач і фарміраванне разгорнутага плана дзеянняў па комплекснай лічбавай трансфармацыі.
Форум "ТІБО" праходзіць з 8 па 12 красавіка на пляцоўцы комплексу "Мінск-Арэна". Спецыялізаваная выстаўка адкрыецца 9 красавіка. Як растлумачыў Канстанцін Шульган, на выстаўцы будуць прадстаўлены распрацоўкі, якія павінны прынесці эканамічны і сацыяльны эфект у розных галінах. Увагу ўдзеляць перспектыўным стартапам, якія могуць стаць прарыўнымі праектамі.-0-
