"Мінскі майстар" і Дні Екацярынбурга. Святочныя мерапрыемствы да Дня горада ў сталіцы ўжо стартавалі
 

10 верасня, Мінск /Кар. БЕЛТА/. "Мінскі майстар" і Дні Екацярынбурга - у сталіцы пачаліся ўжо мерапрыемствы, прымеркаваныя да Дня горада. Аб гэтым расказала журналістам на прэс-канферэнцыі "Аб правядзенні святочных мерапрыемстваў у горадзе Мінску, прысвечаных Дню горада. Пытанні забеспячэння грамадскай бяспекі" начальнік аддзела ўстаноў культуры ўпраўлення культуры Мінгарвыканкама Святлана Сіліч.

"У гэтым годзе 14 верасня Мінску споўніцца 957 гадоў. Але святочныя мерапрыемствы, прымеркаваныя да гэтай даты, пачаліся ўжо. Напярэдадні Дня горада ў Мінскай гарадской ратушы адбудзецца ўрачыстая цырымонія ўзнагароджання мінчан, якія прымаюць актыўны ўдзел у ахове правапарадку. А 13 верасня ў 16.00 у канцэртнай зале "Верхні горад" падвядуць вынікі гарадскога конкурсу "Мінскі майстар". Гэта конкурс прафесійнага майстэрства прадстаўнікоў масавых прафесій. Ён традыцыйны, і ў гэтым годзе будуць выбраны лепшыя майстры у 39 самых масавых прафесіях", - адзначыла Святлана Сіліч.

Таксама 13 верасня на тэрыторыі Верхняга горада пройдуць Дні Екацярынбурга.

"У праграме - святочная канцэртная праграма і выстава гісторыі горада Екацярынбурга і вядомага расійскага мастака Аляксея Яфрэмава, якую можна паглядзець у музеі гісторыі горада Мінска", - расказала Святлана Сіліч.-0-