ДЗЯРЖОРГАНЫДЗЯРЖОРГАНЫ
Флаг Панядзелак, 8 жніўня 2022
Мінск Суцэльная воблачнасць +20°C
Усе навіны
Усе навіны
Грамадства
16 лютага 2021, 16:31

Мінская міжнародная кніжная выстаўка-кірмаш збярэ больш за 280 экспанентаў з 20 краін

Фота з архіва
Фота з архіва

16 лютага, Мінск /Кар. БЕЛТА/. XXVIII Мінская міжнародная кніжная выстаўка-кірмаш, якая пройдзе з 18 па 21 лютага, збярэ 281 экспанент з 20 краін, заявіў сёння журналістам старшыня савета арганізатараў кніжных выставак і кірмашоў, праводзімых у дзяржавах - удзельніцах СНД, генеральны дырэктар ТАА "Макбел" Дзмітрый Макараў, перадае карэспандэнт БЕЛТА.

"Выстаўка пройдзе пад дэвізам "Кніга аб'ядноўвае людзей і краіны". У бягучым годзе форум збярэ 281 экспанент з 20 краін. Так, свае экспазіцыі прадставяць Расія, Казахстан, Іран, Венесуэла, Палесціна, Ізраіль, Пакістан, Турцыя, Германія", - расказаў Дзмітрый Макараў. - Па просьбах наведвальнікаў у гэтым годзе рэжым работы павялічаны на адну гадзіну: з 10.00 да 20.00, у апошні дзень - да 18.00. Для бяспекі ўведзены абавязковы масачны рэжым, пры ўваходзе будзе вымярацца тэмпература, рэкамендавана выкарыстанне антысептыкаў".

Паводле слоў начальніка ўпраўлення выдавецкай і паліграфічнай дзейнасці Міністэрства інфармацыі Уладзіміра Андрыевіча, цэнтральная экспазіцыя выстаўкі будзе сімвалічна аформлена ў стылі агульнага дома. Гасціная будзе аддадзена цэнтральнай пляцоўцы СНД, на якой наведвальнікі выстаўкі азнаёмяцца з экспазіцыяй кніг, уладальнікамі Гран-пры міжнароднага конкурсу "Мастацтва кнігі" СНД за ўсе 17 гадоў правядзення. У кабінеце пісьменніка размесцяць лепшыя кнігі ўсіх краін Садружнасці па гісторыі, культуры, мастацтве, пройдуць сустрэчы пісьменнікаў з наведвальнікамі выстаўкі. На дзіцячай пляцоўцы дадуць магчымасць не толькі ўбачыць літаратурныя навінкі, даведацца аб стварэнні кніг, але і цікава правесці час бацькам з дзецьмі.

Нацыянальны стэнд Беларусі будзе прадстаўлены імправізаванай творчай кухняй з самымі новымі праектамі. Будуць прэзентаваны ўсе кнігі, якія выйшлі ў беларускіх выдавецтвах у 2020 годзе. Наведвальнікі выстаўкі будуць мець магчымасць сустрэцца з аўтарамі, героямі кніг, акунуцца ў творчы працэс стварэння твораў. Плануецца ўдзел сустаршыні праўлення Міждзяржаўнага фонду гуманітарнага супрацоўніцтва дзяржаў - удзельніц СНД Міхаіла Швыдкога, намесніка кіраўніка Расдруку Уладзіміра Грыгор'ева, пісьменніка і публіцыста Сяргея Шаргунова. Адбудзецца таксама прэзентацыя кнігі "Дзве Радзімы - адна краіна" члена Саюза пісьменнікаў Беларусі Ірыны Карнавухавай і члена Курскага рэгіянальнага аддзялення Саюза пісьменнікаў Расіі Міхаіла Разаева.

Упершыню падчас выстаўкі праводзіцца літаратурны конкурс LitUP для пошуку і падтрымкі перспектыўных беларускіх аўтараў і праектаў па наступных намінацыях: паэзія, проза, дзіцячая літаратура, літаратура для падлеткаў, нон-фікшн. Аўтары, у выпадку прызнання іх пераможцамі, маюць прыярытэтнае права на публікацыю сваёй кнігі ў адным з дзяржаўных выдавецтваў тыражом да 1 тыс. экзэмпляраў. Узнагароджанне пераможцаў адбудзецца 20 лютага ў 11.00.

Арганізатары запрашаюць да ўдзелу ў традыцыйным сімпозіуме "Пісьменнік і час" 19 лютага ў 11.00. "Тэма гэтай сустрэчы цесна звязана з дэвізам выстаўкі. Слова мае вялікае значэнне і моцна ўздзейнічае на людзей. І мы хочам пачуць меркаванне літаратараў, грамадскіх дзеячаў пра ролю пісьменнікаў ва ўмовах сучасных міжнародных выклікаў і пагроз. Любы жадаючы можа падключыцца да сімпозіума анлайн і задаць удзельнікам сваё пытанне", - расказаў Уладзімір Андрыевіч. Першы намеснік старшыні Саюза пісьменнікаў Беларусі Алена Стэльмах дадала, што гэта мерапрыемства дапамагае выбудоўваць новыя кантакты. "Вельмі важна, каб беларуская літаратура перакладалася на іншыя мовы. Праз кнігу народы пазнаюць беларускі характар і нашу культурную спадчыну", - сказала яна.

У тэатрах і кінатэатрах, на тэлеканалах у дні работы кірмашу пакажуць фільмы, спектаклі па творах вядомых пісьменнікаў Беларусі і іншых краін. Усе жадаючыя змогуць даехаць да месца правядзення на традыцыйным паэтычным аўтобусе, які будзе курсіраваць ад станцыі метро "Няміга" да выставачнага комплексу на праспекце Пераможцаў, 14, і адначасова паслухаць па дарозе творы знакамітых аўтараў. Праезд на ім будзе бясплатны, як і ўваход на сам кніжны форум. Чакаецца, што яго наведаюць амаль 50 тыс. жыхароў і гасцей сталіцы.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі