26 ліпеня, Шчомысліца /Кар. БЕЛТА/. Мінсельгасхарч пачаў праводзіць маніторынг захаванасці ўраджаю. Аб гэтым паведаміў журналістам намеснік міністра сельскай гаспадаркі і харчавання Уладзімір Гракун, які наведаў з выязной камісіяй поле ААТ "Шчомысліцы" ў Мінскім раёне, перадае карэспандэнт БЕЛТА.
У паездцы прыняў удзел начальнік галоўнага ўпраўлення тэхнічнага прагрэсу і энергетыкі, дзяржаўнага нагляду за тэхнічным станам машын і абсталявання Мінсельгасхарча Станіслаў Карповіч.
"На сённяшні дзень у Беларусі ўбрана практычна 25 працэнтаў, намалочана 1,8 млн т. Анамальная гарачыня паўплывала на ўраджай збожжавых. Пры чаканай ураджайнасці 35 ц/га страцілі каля 4 ц, - сказаў Уладзімір Гракун. - Цяпер асноўнай задачай з'яўляецца кантроль за станам тэхнікі і пазбегнуць страт ураджаю. Для гэтага на палі з сённяшняга дня выязджаюць спецыяльныя групы ад міністэрства, якія правяраюць стан камбайнаў, падчас уборкі кантралююць, колькі збожжа страчвае тэхніка, пасля чаго даюць рэкамендацыі па ўстараненні праблем, калі яны былі зафіксаваны".
Як адзначыў Станіслаў Карповіч, пры выпуску збожжаўборачнага камбайна ў поле абавязкова павінна быць праведзена герметызацыя тых участкаў тэхнікі, якія могуць дапусціць страты. "Збожжаўборачныя камбайны, як імпартныя, так і айчынныя, накіраваны на мінімізацыю страт, таму пры правільнай настройцы любы механізм забяспечвае практычна 100-працэнтную захаванасць", - расказаў начальнік галоўнага ўпраўлення.
На выязным мерапрыемстве таксама было адзначана, што ўсе камбайны, якія лічацца няспраўнымі, у хуткім часе будуць адноўлены. На базы райаграсэрвісаў і аблаграсэрвісаў паступілі неабходныя часткі, якія дадуць магчымасць прывесці камбайны ў рабочы стан і вывесці на палі.
Паралельна ў Беларусі ідзе ўборка азімага рапсу і лёну, нарыхтоўка кармоў. Групы таксама будуць правяраць арганізацыю работы ў гэтых напрамках.-0-
