Мінпрацы вызначыла, колькі беларусы будуць працаваць у 2026 годзе
 

1 кастрычніка, Мінск /Кар. БЕЛТА/. Разліковая норма рабочага часу на 2026 год устаноўлена пастановай Міністэрства працы і сацыяльнай абароны нумар 95 ад 16 верасня 2025 года. Дакумент апублікаваны на Нацыянальным прававым інтэрнэт-партале, паведамляе БЕЛТА.

Разліковая норма рабочага часу на 2026 год пры поўнай норме яго працягласці складае для пяцідзённага рабочага тыдня з выхаднымі днямі ў суботу і нядзелю 2024 гадзіны, для шасцідзённага рабочага тыдня з выхадным днём у нядзелю - 2019 гадзін.

Як растлумачылі ў прэс-службе Міністэрства працы і сацыяльнай абароны, разліковая норма рабочага часу на 2026 год устаноўлена зыходзячы з поўнай нормы працягласці рабочага часу 40 гадзін у тыдзень і разлічана для пяцідзённага рабочага тыдня зыходзячы з працягласці штодзённай работы ў рабочыя дні з панядзелка па пятніцу 8 гадзін, а ў рабочыя дні, якія непасрэдна папярэднічаюць святочным дням, - 7 гадзін. Для шасцідзённага рабочага тыдня - зыходзячы з працягласці штодзённай работы ў рабочыя дні з панядзелка па пятніцу 7 гадзін, у суботу - 5 гадзін, а ў рабочыя дні, якія непасрэдна папярэднічаюць святочным дням, - 6 і 4 гадзіны адпаведна.-0-