8 кастрычніка, Мінск /Кар. БЕЛТА/. Фінансаванне і выплата пенсій ажыццяўляюцца своечасова і ў поўным аб'ёме. Зваротаў наконт пытання затрымкі выплат у органы па працы, занятасці і сацыяльнай абароне не паступала. Аб гэтым карэспандэнту БЕЛТА паведамілі ў Мінпрацы і сацабароны.
Назначаныя гэтымі органамі пенсіі выплачваюцца па выбары атрымальнікаў праз аб'екты паштовай сувязі, банкі або спецыялізаваныя арганізацыі па дастаўцы.
Выплата пенсій адбываецца штомесяц з 5-га па 26-е чысло. Пры гэтым кожнаму атрымальніку ўстаноўлена дата - канкрэтнае чысло, калі пенсія штомесяц дастаўляецца/выплачваецца (па жаданні пенсіянера) у аб'екце паштовай сувязі або залічваецца на рахунак пенсіянера ў банку. Калі дата выплаты пенсіі прыпадае на выхадныя або святочныя дні, то выплата ажыццяўляецца датэрмінова.
"Фінансаванне і выплата пенсій у студзені-верасні праводзіліся своечасова і ў поўным аб'ёме, - запэўнілі ў Мінпрацы і сацабароны. - У кастрычніку таксама выплата пенсій пачалася своечасова. Зваротаў ад грамадзян у органы па працы, занятасці і сацыяльнай абароне па пытанні затрымкі выплаты пенсій не паступала".
Калі ў пенсіянера ўзнікаюць якія-небудзь пытанні па выплаце пенсіі, ён можа звярнуцца ў орган, які ажыццяўляе яго пенсіянаванне, або на інфалінію Мінпрацы па тэлефоне 8 (017) 309-9-309.-0-