2 снежня, Мінск /Кар. БЕЛТА/. У Беларусі будуць максімальна развіваць добраахвотнае пенсійнае страхаванне, паведаміла журналістам міністр працы і сацабароны Ірына Касцевіч, каменціруючы прадстаўленую сёння ў Палаце прадстаўнікоў праграму дзейнасці ўрада да 2025 года, перадае карэспандэнт БЕЛТА.
"Задача дзяржавы, урада - забяспечыць пенсійныя гарантыі, яе ніхто не адмяняе. Другое - максімальна развіваць добраахвотнае пенсійнае накапленне, каб павялічыць памер пенсій і забяспечыць дастойны ўзровень і якасць жыцця ў старасці", - сказала Ірына Касцевіч.
Такім чынам, паводле слоў міністра, дзяржава нацэлена падтрымліваць сярэднюю пенсію на ўзроўні 40 працэнтаў ад сярэдняй зарплаты па краіне. У той жа час у людзей ёсць магчымасць забяспечыць павелічэнне выплат за кошт добраахвотнага пенсійнага страхавання.
Яна канстатавала, што механізм добраахвотнага пенсійнага страхавання пакуль не вельмі запатрабаваны ў грамадзян. "На жаль, сёння толькі каля 4 працэнтаў ці крыху больш займаюцца гэтым. Задача ўрада - максімальна разгарнуць растлумачальную работу, папулярызацыю гэтага механізма сярод працуючых грамадзян, асабліва тых, у якіх даволі высокая зарплата, што перавышае сярэдні ўзровень па краіне", - адзначыла міністр.
"Задача ўрада - забяспечыць дастойны ўзровень даходаў незалежна ад таго, якога ўзросту грамадзянін. Але гэта задача не толькі дзяржавы, але і самога чалавека. Памер пенсіі залежыць ад стажу працоўнай дзейнасці і ўзроўню заработнай платы, з якой чалавек ідзе на пенсію. Таму кожны павінен быць нацэлены максімальна доўга працаваць для максімальнага працоўнага стажу і, зразумела, павышаць свой прафесійны ўзровень, каб забяспечваць кар'ерны рост і атрымліваць максімальна высокую зарплату", - дадала Ірына Касцевіч.-0-
