Віктар Хрэнін
13 лютага, Барысаўскі раён /Кар. БЕЛТА/. Міністр абароны Віктар Хрэнін у размове з журналістамі расказаў, які эфект чакаецца атрымаць ад раптоўнай праверкі гатоўнасці Узброеных Сіл, перадае карэспандэнт БЕЛТА.
"Эфект - што мы павінны быць пастаянна ў напружанні. Ваеннаслужачы павінен быць гатовы маральна і фізічна. І, вядома, быць прафесійна падрыхтаваны", - сказаў Віктар Хрэнін.
Міністр адзначыў, што ў выпадку пачатку ўзброенага канфлікту праціўнік разлічвае на раптоўнасць і спрабуе дыктаваць умовы. "Не павінна быць так, што нас ашаламілі, мы разгубіліся і разбегліся. Мы павінны адразу даць адпор", - заявіў ён.
Адказваючы на пытанне аб ходзе раптоўнай праверкі, якая праводзіцца ва Узброеных Сілах па даручэнні кіраўніка дзяржавы, Віктар Хрэнін адзначыў, што падводзіць вынікі пакуль заўчасна. "Галоўнакамандуючы асабіста праверыў боегатоўнасць Узброеных Сіл, паглядзеў раён размяшчэння і камандны пункт батальёна, заслухаў даклад камандзіра, ацаніў магчымасць размяшчэння і побыт ваеннаслужачых", - звярнуў увагу кіраўнік ваеннага ведамства.
Акрамя таго, Прэзідэнт Беларусі праверыў узровень агнявой вывучкі ваеннаслужачых. "Так, адзін стралок не вельмі добра адстраляў, другі - лепш. Але гэта так і будзе (у выпадку баявога сутыкнення. - Заўвага БЕЛТА). Нехта лепш падрыхтаваны, нехта горш", - канстатаваў Віктар Хрэнін.
Ён дадаў, што батальёну давядзецца выканаць на працягу трох дзён мерапрыемствы па агнявой падрыхтоўцы. Пасля гэтага будуць здадзены нарматывы па фізічнай падрыхтоўцы. Камісія пад кіраўніцтвам дзяржсакратара Савета бяспекі дасць ацэнку і даложыць кіраўніку дзяржавы аб выніках.
"Як сказаў Прэзідэнт, праверка будзе праходзіць да вясны. Мы павінны быць гатовы і не павінны расслабляцца. Гэта самая важная задача, - падкрэсліў міністр абароны. - Тым больш, падраздзяленні, якія мы ўбачылі, - гэта сілы неадкладнага рэагавання. Яны павінны быць гатовы да выканання задач".
Як паведамлялася БЕЛТА, Прэзідэнт Беларусі Аляксандр Лукашэнка асабіста праверыў боегатоўнасць Узброеных Сіл. Кіраўнік дзяржавы ў рамках раптоўнай праверкі наведаў 227-ы агульнавайсковы палігон у Барысаўскім раёне.
Маштабная праверка Узброеных Сіл па даручэнні Прэзідэнта Беларусі пачалася 16 студзеня. Першачарговая мэта - убачыць аб'ектыўную карціну, рэальны стан войскаў, ацаніць дзеянні ваеннаслужачых. Менавіта таму мерапрыемствы маюць раптоўны характар. Ключавой адметнасцю праверкі з'яўляецца яе арганізацыя. Кіраўнік дзяржавы прыводзіць у баявую гатоўнасць воінскія часці, абмінаючы Міністэрства абароны і Генеральны штаб.
Аляксандр Лукашэнка трымае ход праверкі на асабістым кантролі, рэгулярна заслухоўвае даклады дзяржаўнага сакратара Савета бяспекі.
Пры правядзенні праверкі ўлічваецца вопыт вядзення баявых дзеянняў у сучасных ваенных канфліктах. Яе вынікі будуць пакладзены ў аснову ўдасканалення беларускай арміі.-0-
Падпісвайцеся на нас у
