22 верасня, Мінск /Кар. БЕЛТА/. Міністэрства аховы здароўя змякчыла патрабаванні да стану здароўя вадзіцеляў і суднавадзіцеляў. Адпаведныя пытанні ўрэгуляваны пастановамі Міністэрства аховы здароўя нумар 94 і нумар 95, паведамляе БЕЛТА.
Адзначаецца, што раней дзеючыя нарматыўныя акты страцілі сілу і ўсе пытанні медыцынскага агляду (пераагляду) вадзіцеляў і суднавадзіцеляў урэгуляваны двума гэтымі дакументамі.
Як паведамілі ў прэс-службе Міністэрства аховы здароўя, перагледжаны формы медыцынскіх дакументаў, якія выкарыстоўваюцца ў сваёй рабоце медыцынскімі вадзіцельскімі камісіямі, удакладнены функцыі гэтых камісій, змякчаны патрабаванні да стану здароўя вадзіцеляў і суднавадзіцеляў.
Напрыклад, з пераліку проціпаказанняў да кіравання выключаны такія захворванні, як цукровы дыябет, анкалагічныя захворванні, пашыраны ўмовы допуску да кіравання пры наяўнасці пэўных захворванняў, скарочаны медыцынскія паказанні для скарачэння тэрмінаў правядзення абавязковага медыцынскага пераагляду вадзіцеляў.-0-
