15 ліпеня, Мінск /Кар. БЕЛТА/. Рост захваральнасці на COVID-19 чакаецца з верасня, паведаміў журналістам намеснік міністра аховы здароўя - галоўны дзяржаўны санітарны ўрач Беларусі Аляксандр Тарасенка, перадае карэспандэнт БЕЛТА.
"Мы чакаем рост захваральнасці з пачатку верасня, таму рэкамендуем усім грамадзянам, асабліва з груп рызыкі, якія маюць хранічныя захворванні, працуюць на транспарце, у сферы бытавога абслугоўвання, медыкам, прайсці бустарызацыю", - сказаў Аляксандр Тарасенка.
Намеснік міністра адзначыў, што згодна з загадам Міністэрства аховы здароўя бустарызацыя праводзіцца вакцынамі "Спадарожнік Лайт" і "Спадарожнік V".
Аляксандр Тарасенка падкрэсліў, што цяпер важна падрыхтавацца да магчымага ўздыму захваральнасці, паколькі амікрон муціруе. "Тым больш што цыркуляцыя варыянта амікрона ВА.5 у нас таксама рэгіструецца", - заўважыў ён.
На гэты момант у Беларусі няма ўздыму захваральнасці. "Пакуль мы не рэгіструем. Знаходзімся ў міжэпідэмічным перыядзе, і захваральнасць у нас меншая, чым у папярэднія міжэпідэмічныя перыяды", - адзначыў намеснік міністра.
Разам з тым кампанія вакцынацыі ў Беларусі прадаўжаецца. "На сёння можна гаварыць фактычна аб 70 працэнтах вакцынаваных з ліку ўсяго насельніцтва Беларусі ва ўзросце ад 12 гадоў і старэйшых. Вакцын для вакцынацыі і праходжання бустарызацыі (рэвакцынацыі) дастаткова: гэта "Спадарожнік V", "Спадарожнік Лайт", вакцына "Сінафарм". Гэта значыць тыя вакцыны, з якімі мы працуем з пачатку кампаніі па вакцынацыі", - сказаў Аляксандр Тарасенка. Сярод дзяцей 12-17 гадоў на сёння вакцынавана 26 працэнтаў.
Аляксандр Тарасенка таксама расказаў, на якім этапе работа над айчыннай вакцынай. "Мы на сёння ажыццяўляем трансфер вакцыны для доследна-прамысловай вытворчасці. Прамысловая вытворчасць плануецца ў канцы 2023 - пачатку 2024 года", - адзначыў ён.-0-
