2 чэрвеня, Мінск /Кар. БЕЛТА/. Міністэрства аховы здароўя 21 мая прыняло загад нумар 557 для ўдасканалення мер, якія прымаюцца, па сучаснай дыягностыцы і лячэнні пацыентаў з COVID-19. Каментарый да дакумента размешчаны на сайце Міністэрства аховы здароўя, паведамляе БЕЛТА.
Загадам удакладнены клініка-лабараторныя крытэрыі ўстанаўлення дыягназу COVID-19. У прыватнасці, у дакуменце прапісаны групы пацыентаў, якія падлягаюць лабараторнаму абследаванню, апісаны парадак даследавання пры выпісцы і пераводзе. Устаноўлена, што пацыентам з лёгкай і бессімптомнай формай COVID-19 тэсціраванне праводзіцца на 14 суткі і пры адмоўным рэзультаце іх выпісваюць. Калі ж у пацыента станоўчы рэзультат, то закрываць бальнічны ліст будуць на 21 дзень.
У Міністэрстве аховы здароўя падкрэслілі, што сучасная ПЦР-дыягностыка дае магчымасць выдзеліць фрагменты РНК-віруса, але на сённяшні момант гэта не сведчыць аб яго жыццяздольнасці. "У здаровага чалавека ў норме РНК-каранавіруса вызначацца не павінна. Адпаведна, калі першасна выяўляецца пацыент (з праяўленнем сімптомаў або без) з наяўнасцю РНК, то гэта сведчыць аб інфіцыраванні. Пры гэтым, як паказвае практыка, у вялікай колькасці пацыентаў рэшткі РНК- віруса пры ПЦР-дыягностыцы могуць выдзяляцца больш за месяц. Але вопыт кітайскіх і іншых вучоных паказвае, што гэта нежыццяздольны вірус, які не можа інфіцыраваць кагосьці яшчэ", - расказалі ў міністэрстве.
"Усе даследаванні паказваюць, што ўдалося выдзеліць і атрымаць жыццяздольны вірус максімум праз 12 дзён ад моманту з'яўлення клінічных сімптомаў. Улічваючы, што бессімптомныя і лёгкія формы ў Беларусі тыпіруюцца (многія краіны бессімптомныя формы наогул не лічаць), то паўстае пытанне аб тым, што наяўнасць РНК-віруса не сведчыць аб здольнасці заражаць", - звярнулі ўвагу ў Міністэрстве аховы здароўя. У літаратуры не апісана выпадкаў інфіцыравання пацыентаў праз 21 дзень ад моманту дыягнаставання працэсу з'яўлення клінічных сімптомаў пры лёгкіх формах захворвання. Пры гэтым абломкі віруса ў клетцы могуць змяшчацца яшчэ дастаткова доўга, але жыццяздольны вірус, які можа заражаць іншых, яны не выдзяляюць. У сувязі з гэтым вядучыя эксперты краіны прынялі рашэнне аб тым, што не трэба рабіць пацыентам лішні раз не зусім прыемную працэдуру ўзяцця мазка, які не мае клінічнага значэння. З гэтым звязана рашэнне наконт бальнічных у пацыентаў з лёгкай і бессімптомнай формай COVID-19.
Загадам зменена кратнасць прыёму Фавіпіравіра - процівіруснага сродку, які раней выкарыстоўваўся галоўным чынам пры лячэнні грыпу. На яго ўскладаліся пэўныя надзеі пры лячэнні COVID-19. У загадзе падрабязна агавораны не толькі дозы, працягласць і кратнасць прыёму, але і проціпаказанні да яго назначэння.
Таксама дакументам вызначаны новыя падыходы да выкарыстання гідраксіхларахіна пры лячэнні COVID-19. СААЗ прыпыніла выпрабаванні гэтага лекавага сродку па міжнароднай праграме Solidarity. На працягу прыкладна двух тыдняў СААЗ плануе даць тлумачэнні сваёй канчатковай пазіцыі па гэтай праблеме. Кантроль за назначэннем гідраксіхларахіна яшчэ больш узмоцнены, і пытанне пастаянна адсочваецца.
Загадам рэгламентуецца выбар і дазіраванне антыкаагулянтаў для лячэння і прафілактыкі тромбаэмбалічных ускладненняў у пацыентаў. Інфармацыя датычыцца ўсіх аспектаў работы з такімі ўскладненнямі і ДВС-сіндромам у стацыянарах, дзе такім пацыентам аказваецца дапамога. "Цяжкасці яшчэ і ў тым, што лакалізацыя працэсу вельмі разнастайная, адсюль і цяжкасці ў хуткай клінічнай трактоўцы сітуацыі", - адзначылі ў міністэрстве. У дакуменце адлюстравана таксама выкарыстанне глюкакортыкастэроідаў.
"Змяненні ў пратаколы лячэння будуць і ў далейшым уносіцца па меры паступлення і абагульнення клінічных даных, публікацый і распрацоўкі міжнародных рэкамендацый па гэтым пытанні", - рэзюмавалі ў Міністэрстве аховы здароўя.-0-
