10 лютага, Мінск /Кар. БЕЛТА/. Завяршаецца планавая вакцынацыя медработнікаў Беларусі расійскай вакцынай супраць каранавіруса "Спадарожнік V", паведамілі БЕЛТА ў прэс-службе Міністэрства аховы здароўя.
Першымі былі вакцынаваны медработнікі, якія знаходзяцца ў зоне рызыкі. Міністэрства аховы здароўя размеркавала вакцыну па рэгіёнах - у залежнасці ад заявак устаноў аховы здароўя. Усе пытанні выканання халадовага ланцуга адпрацаваны.
З ліку медработнікаў, заяўленых на першы этап вакцынацыі, у Брэсцкай вобласці прышчэплены больш за 91 працэнт запісаных, у Віцебскай, Гомельскай, Гродзенскай абласцях і Мінску - 100 працэнтаў, Мінскай вобласці - 78 працэнтаў, Магілёўскай - 94 працэнты.
У Міністэрстве аховы здароўя дадалі, што імунізацыя застаецца важнейшым кампанентам у барацьбе з пандэміяй. Вакцыная праводзіцца ў добраахвотным парадку. На гэтым тыдні будзе завершана вакцынацыя медработнікаў, а паралельна будуць вакцынавацца работнікі ўстаноў адукацыі, інтэрнатаў, дамоў састарэлых і сацыяльных служб - усе тыя грамадзяне, якія з-за сваёй прафесіі шмат кантактуюць з людзьмі.-0-