27 мая, Мінск /Кар. БЕЛТА/. Міністэрства адукацыі бачыць асноўную адукацыйную траекторыю для выпускнікоў школ, устаноў прафтэх і сярэдняй спецыяльнай адукацыі ў паступленні ў беларускія ВНУ. Аб гэтым заявіў начальнік галоўнага ўпраўлення прафесійнай адукацыі Міністэрства адукацыі Сяргей Каспяровіч у час круглага стала "Вышэйшая адукацыя ў Беларусі. Як вызначыцца з выбарам будучай прафесіі", паведамляе БЕЛТА.
"Мы бачым асноўную адукацыйную траекторыю для выпускнікоў школ, устаноў прафтэх і сярэдняй спецыяльнай адукацыі ў паступленні ў нашы ВНУ. Спектр спецыяльнасцей, якасць адукацыі, узровень кампетэнцый выкладчыкаў і ў цэлым атрыманы дыплом адпавядаюць сусветнаму ўзроўню, а па асобных напрамках мы з'яўляемся лідарамі", - заявіў Сяргей Каспяровіч.
Ён адзначыў, што ў Беларусі дзейнічае сістэма падрыхтоўкі спецыялістаў, калі пры неабходнасці студэнт можа быць накіраваны за мяжу, напрыклад, у Расію, на навучанне па напрамках, па якіх не разгорнута падрыхтоўка ў Беларусі. "Такія напрамкі ў рамках дзеючага заканадаўства ёсць. Яны рэалізуюцца кропкава. Цяпер распрацоўваецца новая нарматыўная база, якая гэты механізм крыху ўдасканаліць. Аднак мы выразна бачым, што тут важна ўзважваць два аспекты. Першы - магчымасць развіцця адпаведнага напрамку падрыхтоўкі ў сябе ў краіне, улічваюцца эфект маштабу, патрэбнасці эканомікі, неабходная маттэхбаза і эканамічная мэтазгоднасць. Другі - неабходнасць і магчымасць кропкавага навучання спецыялістаў у невялікіх колькасцях за мяжой. Напрыклад, такая работа праводзілася ў рамках развіцця сістэмы падрыхтоўкі кадраў для патрэб атамнай энергетыкі", - адзначыў начальнік галоўнага ўпраўлення.-0-
