Мінабароны Беларусі: прыцягненне спецназа Украіны да ўзмацнення дзяржграніцы - усяго толькі шырма

5 ліпеня, Мінск /Кар. БЕЛТА/. Прыцягненне падраздзяленняў спецназа Украіны да нібыта ўзмацнення дзяржграніцы - усяго толькі добрая шырма. Аб гэтым на брыфінгу заявіў журналістам начальнік галоўнага ўпраўлення - намеснік начальніка Генеральнага штаба Узброеных Сіл Уладзімір Купрыянюк, перадае карэспандэнт БЕЛТА.

"З сярэдзіны чэрвеня назіраецца нічым не абгрунтаваная актыўнасць на Ровенскім і Жытомірскім напрамках. Мы адзначаем перакідку непасрэдна да дзяржаўнай граніцы падраздзяленняў спецыяльнага прызначэння як са складу сіл спецыяльных аперацый, так і Нацыянальнай гвардыі Украіны, узмоцненых бранятэхнікай, у тым ліку заходняй вытворчасці", - сказаў Уладзімір Купрыянюк.

Паводле ацэнкі беларускага ваеннага ведамства, прыцягненне падраздзяленняў спецназа да нібыта ўзмацнення дзяржграніцы - усяго толькі добрая шырма. "Задачы спецназа зусім іншыя, а менавіта: правядзенне дыверсій на крытычна важных аб'ектах грамадзянскай і ваеннай інфраструктуры, падрыхтоўка незаконных узброеных фарміраванняў, а таксама арганізацыя партызанскай дзейнасці на сумежнай тэрыторыі", - адзначыў Уладзімір Купрыянюк.

Адпаведна можна сцвярджаць, рэзюмаваў ён, што знаходжанне падраздзяленняў спецыяльнага прызначэння ў непасрэднай блізкасці ад нашай граніцы з'яўляецца не чым іншым, як адным з этапаў падрыхтоўкі да магчымага вываду дыверсійных груп на нашу тэрыторыю.-0-