19 лютага 2026, 13:28

Мінабароны Беларусі плануе правесці інвентарызацыю адносін з замежнымі ваеннымі аташэ

19 лютага, Мінск /Кар. БЕЛТА/. Беларусь плануе правесці пэўную інвентарызацыю адносін з замежнымі ваеннымі аташэ. Аб гэтым журналістам заявіў начальнік Дэпартамента міжнароднага ваеннага супрацоўніцтва - памочнік міністра абароны па пытаннях міжнароднага ваеннага супрацоўніцтва Валерый Равенка па выніках брыфінгу па актуальных пытаннях ваеннай палітыкі, будаўніцтва і развіцця Узброеных Сіл Беларусі, перадае карэспандэнт БЕЛТА.

У брыфінгу ўдзельнічалі акрэдытаваныя пры Міністэрстве абароны Беларусі прадстаўнікі замежнага ваенна-дыпламатычнага корпуса з больш як 20 дзяржаў. Іх інфармавалі аб актуальных пытаннях ваеннай палітыкі, будаўніцтва і развіцця Узброеных Сіл. Важным момантам стала асвятленне поглядаў кіраўніцтва беларускага абароннага ведамства на развіццё ваенна-палітычнай абстаноўкі ў свеце і Еўрапейскім рэгіёне.

Было разгледжана і пытанне дзейнасці замежных ваенных аташэ ў Беларусі. "Яны карыстаюцца дабротамі нашай дзяржавы, бачаць, што ў нас ціха, спакойна, народ забяспечаны. Але пры гэтым асобныя ўсё ж такі прытрымліваюцца палітыкі сваіх дзяржаў, сваіх палітычных дэпартаментаў і недзе падаюць інфармацыю не зусім у канструктыўным рэчышчы. Таму ў нас сёння была з імі даволі сур'ёзная размова, у якой мы прасілі аб'ектыўна асвятляць падзеі, якія адбываюцца, сітуацыю ў нашай дзяржаве, што дасць магчымасць прымаць адпаведныя рашэнні для выбудоўвання адносін з Рэспублікай Беларусь. Гэта пытанне вельмі сур'ёзнае, і мы будзем праводзіць пэўную інвентарызацыю нашых адносін. Хацеў бы нагадаць, што ў нас акрэдытавана 36 замежных дзяржаў, з іх 10 дзяржаў - членаў НАТА, з якімі мы выбудоўваем канструктыўныя, зразумелыя кожнаму з нас адносіны. Мы хочам міру і, як сказаў Прэзідэнт нашай дзяржавы, цяпер час канкрэтных спраў", - рэзюмаваў памочнік міністра абароны.-0-