Міклашэвіч: датэрміновае галасаванне пашырае магчымасці грамадзян рэалізаваць свае выбарчыя правы

23 студзеня, Мінск /Кар. БЕЛТА/. Датэрміновае галасаванне пашырае магчымасці рэалізацыі грамадзянамі сваіх выбарчых канстытуцыйных правоў. Аб гэтым заявіў журналістам старшыня Канстытуцыйнага суда Пётр Міклашэвіч, які прыняў удзел у датэрміновым галасаванні, перадае карэспандэнт БЕЛТА.

"У сучасных умовах аб'ектыўна неабходна, каб дзяржаву ўзначальваў чалавек, які можа эфектыўна выкарыстоўваць прэзідэнцкія паўнамоцтвы ў інтарэсах беларускага народа, канкрэтнымі справамі забяспечваць стабільнасць і дабрабыт, мір і бяспеку ў нашай краіне", - сказаў Пётр Міклашэвіч.

У Беларусі ў адпаведнасці з канстытуцыйнымі прынцыпамі сфарміравана выбарчая сістэма і наша выбарчае заканадаўства адпавядае міжнародным стандартам дэмакратычных выбараў, адзначыў старшыня Канстытуцыйнага суда.

"Устаноўлены канстытуцыйна-прававы механізм па забеспячэнні выбарчага працэсу, прынятыя ЦВК арганізацыйныя меры даюць магчымасць нашым грамадзянам свабодна выказаць сваё волевыяўленне на выбарах Прэзідэнта Рэспублікі Беларусь. Пры гэтым хачу адзначыць, што Выбарчы кодэкс прадугледжвае магчымасць датэрміновага галасавання. Гэта палажэнне не супярэчыць Канстытуцыі, паколькі пашырае магчымасці і ўмовы рэалізацыі грамадзянамі сваіх выбарчых канстытуцыйных правоў, - дапоўніў Пётр Міклашэвіч. - Выказваю ўпэўненасць, што грамадзяне нашай краіны прымуць актыўны ўдзел у галасаванні, праявяць адзінства і з'яднанасць па далейшым забеспячэнні паступальнага развіцця Рэспублікі Беларусь як дэмакратычнай, сацыяльнай, прававой дзяржавы".