19 сакавіка, Мінск /Кар. БЕЛТА/. Супрацоўніцтву ва ўмовах пандэміі COVID-19 было прысвечана сумеснае пасяджэнне базавай арганізацыі грамадскага здароўя і інфарматызацыі аховы здароўя дзяржаў - удзельніц СНД і адпаведнай міждзяржаўнай сеткі інстытутаў. Аб гэтым БЕЛТА паведамілі ў прэс-службе Выканаўчага камітэта СНД.
З дакладамі на пасяджэнні выступілі прадстаўнікі Цэнтральнага навукова-даследчага інстытута арганізацыі і інфарматызацыі аховы здароўя Міністэрства аховы здароўя Расіі на чале з яго дырэктарам Вольгай Кабяковай, рэктар Ташкенцкай медыцынскай акадэміі Алішэр Шадманаў, дырэктар Беларускага рэспубліканскага навукова-практычнага цэнтра медыцынскіх тэхналогій, інфарматызацыі, кіравання і эканомікі аховы здароўя Дзмітрый Рузанаў.
Міждзяржаўная сетка інстытутаў грамадскага здароўя і інфармацыі аховы здароўя была створана ў 2016 годзе рашэннем Савета па супрацоўніцтве ў галіне аховы здароўя СНД. У яе склад уваходзіць шэраг медыцынскіх навукова-практычных арганізацый Арменіі, Беларусі, Кыргызстана, Расіі, Таджыкістана і Туркменістана.
У задачы сеткі ўваходзяць супрацоўніцтва і каардынацыя ў падрыхтоўцы абгрунтаваных прапаноў да сумесных выступленняў дзяржаў СНД, у тым ліку праз членаў Міждзяржаўнай камісіі па ўзаемадзеянні з Сусветнай арганізацыяй аховы здароўя, на пасяджэннях кіруючых органаў і камітэтаў СААЗ, падтрымка збору, абагульнення і распаўсюджвання тэхналогій, метадаў і інструментаў у галіне аховы здароўя, забеспячэння абмену перадавым вопытам у галіне грамадскага здароўя і інфармацыі аховы здароўя.-0-
