18 студзеня, Мінск /Кар. БЕЛТА/. Медыкі не рэкамендуюць акунацца ў палонку пасля перанесенага COVID-19, паведамляе БЕЛТА са спасылкай на прэс-службу Міністэрства аховы здароўя.
"Ёсць паняцце "посткаранавірусны сіндром". Размова ідзе аб тым, што нават калі працэс запалення скончыўся, могуць яшчэ заставацца ўскладненні з боку дыхальнай, сардэчна-сасудзістай сістэм - лішні раз нагружаць арганізм стрэсам не трэба", - адзначылі ў Міністэрстве аховы здароўя.
Купанне ў палонцы для непадрыхтаванага чалавека - стрэс. Гэта можа прывесці да зрыву імунітэту і развіцця інфекцый дыхальных шляхоў, у тым ліку пнеўманій. "Ва ўмовах напружанай сітуацыі па COVID-19 гэта неапраўданая дадатковая высокая рызыка захворвання", - лічаць спецыялісты Міністэрства аховы здароўя. Трэба загадзя пракансультавацца са сваім урачом.
Нечаканае для арганізма апусканне ў халодную ваду можа справакаваць іншыя розныя хранічныя захворванні, у тым ліку сардэчна-сасудзістыя.
Калі ў чалавека ёсць нейкае недамаганне, то ад купання трэба адназначна адмовіцца, дадалі ў Міністэрстве аховы здароўя.-0-
