11 студзеня, Мінск /Святлана Васілеўская - БЕЛТА/. Медустановы Беларусі да 2021 года падключацца да адзінай інфармацыйнай сістэмы аховы здароўя, паведаміў карэспандэнту БЕЛТА намеснік міністра аховы здароўя Вячаслаў Шыла, гаворачы аб планах па інфарматызацыі галіны.
На гэтым этапе ставіцца больш глабальная задача - інфарматызацыя галіны, накіраваная на аб'яднанне ўсіх устаноў аховы здароўя, адзначыў Вячаслаў Шыла. Плануецца стварэнне адзінага інфармацыйнага асяроддзя, састаўной часткай якога стане інтэграваная электронная карта пацыента, аўтаматызаванае рабочае месца ўрача, асабісты інтэрнэт-кабінет пацыента. Ставіцца задача выйсці на ўзаемадзеянне з Міністэрствам працы і сацабароны, іншымі дзяржорганамі.
Па выніках работы з пастаўшчыкамі інфармацыйных прадуктаў маем намер да канца 2018 - пачатку 2019-га атрымаць цэнтралізаваную інфармацыйную сістэму аховы здароўя (платформу) для абмену медыцынскімі данымі і развіцця новых цэнтралізаваных паслуг электроннай аховы здароўя. А ў 2019-2021 плануецца падключэнне ўсіх устаноў да гэтай платформы і фарміраванне адзінай базы даных па стане здароўя пацыентаў.
Адзінае інфармацыйнае асяроддзе, як чакаецца, аб'яднае ўсе медыцынскія цэнтры і фармацэўтычныя сеткі, у тым ліку недзяржаўнай формы ўласнасці. Дзякуючы гэтаму ўстановы аховы здароўя змогуць абменьвацца вынікамі дыягнастычных даследаванняў. Выгадна гэта будзе ў першую чаргу самому пацыенту, паколькі не давядзецца праходзіць даследаванні, праведзеныя раней. Адзіная база дасць магчымасць лечачаму ўрачу валодаць поўнай інфармацыяй аб пацыенце, такім чынам, ён зможа больш аператыўна прымаць рашэнні ў тыя ці іншыя крытычныя моманты.
Вялікія магчымасці адкрывае тэлемедыцына, якая дае магчымасць арганізаваць дыстанцыйнае кансультаванне, у тым ліку для вырашэння пытання аб неабходнасці шпіталізацыі. Такое ўзаемадзеянне ў пэўнай ступені ўжо наладжана паміж рэспубліканскімі, абласнымі ўстановамі аховы здароўя, цэнтральнымі раённымі бальніцамі. Напрыклад, паміж Мінскім гарадскім анкадыспансерам і РНПЦ радыяцыйнай медыцыны ў Гомелі вядзецца кансультаванне па марфалагічных даследаваннях, звязаных з паталогіяй шчытападобнай залозы. Такое супрацоўніцтва будзе пашырана. Паводле слоў намесніка міністра, трэба будзе распрацаваць дакладныя стандарты, якія выключалі б недакладнасці ў рабоце па гэтых напрамках. З юрыдычнага пункту гледжання гэта даволі складанае пытанне.
У 2018 годзе па ўсёй краіне прадоўжыцца паэтапнае ўкараненне электроннага рэцэпта, што дасць магчымасць знізіць нагрузку на ўрача з пункту гледжання афармлення медыцынскай дакументацыі. "Мы плануем у перспектыве перагледзець падыходы, звязаныя з формай электроннага рэцэпта, тэрмінамі яго захоўвання, магчымасцю дыстанцыйна для асобных катэгорый пацыентаў выпісваць рэцэпты па тых ці іншых напрамках", - сказаў намеснік міністра.-0-
