28 сакавіка, Мінск /Кар. БЕЛТА/. Першае пасяджэнне Савета па культуры пры Міністэрстве культуры прайшло ў Нацыянальнай бібліятэцы. Тэма пасяджэння - "Аб рэалізацыі кадравай палітыкі і падрыхтоўцы спецыялістаў у сферы культуры", перадае карэспандэнт БЕЛТА.
"Сёння першае пасяджэнне савета па культуры пры Міністэрстве культуры. Тэма актуальная - кадравае забеспячэнне сферы. Мы бачым пройдзены шлях і з задавальненнем адзначаем, што ў большасці сваёй пытанне вырашаецца станоўча. Але разам з тым сфера культуры мае неабходнасць у абнаўленні кадраў. Сур'ёзнае пытанне з рэзервам кадраў. Мы павінны работу выбудаваць крыху на іншым узроўні, каб у выпадку неабходнасці была лаўка запасных - тых, хто зможа ў любы час прыйсці і далей развіваць ідэі ў сферы культуры і выконваць якасна свае прафесійныя абавязкі. Гэта закон для кожнай сферы, і сфера культуры не з'яўляецца тут якім-небудзь выключэннем. Таму сёння мы, збіраючы нашых самых аўтарытэтных супрацоўнікаў, работнікаў сферы культуры, вынеслі пытанне на абмеркаванне", - адзначыў міністр культуры Анатоль Маркевіч.
Паводле яго слоў, самае галоўнае выпрацаваць тыя механізмы, якія дазволяць і ў кароткатэрміновай, і ў доўгатэрміновай перспектыве вырашаць паступова, паэтапна наспелыя праблемы ў кадравым забеспячэнні. "У нас ёсць шэраг навучальных устаноў, якія паспяхова працуюць, ёсць Інстытут павышэння кваліфікацыі. Гэта значыць вельмі шмат тых структур, якія прызначаны ў сваёй дзейнасці, выконваючы свае функцыі, вырашаць надзённыя праблемы. Наколькі гэта атрымліваецца - трэба будзе сур'ёзна абмеркаваць і зрабіць высновы", - дапоўніў міністр.
У савет уваходзяць заслужаныя дзеячы сферы культуры Беларусі, дэпутаты, работнікі выканкамаў, кіраўнікі ўстаноў культуры, грамадскіх аб'яднанняў.-0-
