3 снежня, Мінск /Кар. БЕЛТА/. Маразы ў Беларусі ўзмоцняцца ў пачатку наступнага тыдня, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Снежань - самы цёмны месяц года. У сярэднім у Мінску за месяц бывае толькі 27 сонечных гадзін. Пры сярэдняй працягласці светлавога дня крыху больш за 7 гадзін зусім яснага надвор'я ў нашых шыротах у снежні не бывае. Толькі выпаўшы снег стварае дадатковую падсветку. Паводле апошніх даных, паўсюдна ў Беларусі ўсталявалася снежнае покрыва вышынёй 1-7 см, толькі на паўночным усходзе Віцебскай вобласці таўшчыня снегу складае 12 см", - расказалі ў Белгідрамеце.
У пятніцу, 4 снежня, паступленне цёплай і вільготнай паветранай масы з паўднёвых шырот абумовіць воблачнае надвор'е. Месцамі пройдуць невялікія ападкі ў выглядзе мокрага снегу і дажджу, якія не істотна паўплываюць на вышыню снежнага покрыва. У асобных раёнах чакаецца галалёд, слабы туман. На дарогах месцамі магчыма галалёдзіца. Вецер прагназуецца паўднёва-ўсходні парывісты, месцамі моцны парывісты. Тэмпература паветра ўначы складзе ад мінус 4 да плюс 1, удзень будзе ад мінус 1 да плюс 4 градусаў.
На выхадных надвор'е ў асноўным абумовіць перыферыя антыцыклону з цэнтрам над сярэдняй Волгай, толькі ўначы ў суботу, 5 снежня, яшчэ захаваецца ўплыў вільготнай паветранай масы. У суботу будзе пераважна воблачна. Уначы месцамі па краіне пройдуць кароткачасовыя дажджы, удзень без істотных ападкаў. Па ўсходзе на асобных участках дарог чакаецца галалёдзіца. Вецер прагназуецца паўднёва-ўсходні парывісты, месцамі моцны парывісты. Тэмпература паветра на працягу сутак складзе ад нуля да плюс 5, ва ўсходніх раёнах - 1-3 градусы марозу, удзень па захадзе - 6-8 градусаў цяпла.
У нядзелю, 6 снежня, будзе воблачна з праясненнямі і пераважна без ападкаў. На асобных участках дарог чакаецца галалёдзіца. Вецер прагназуецца паўднёва-заходні парывісты, у асобных раёнах моцны парывісты. Тэмпература паветра ўначы складзе ад мінус 7 па ўсходзе да плюс 5 па захадзе краіны. Удзень будзе ад мінус 4 да плюс 3, у паўднёва-заходніх раёнах - 4-6 градусаў цяпла.
У пачатку наступнага тыдня маразы ўзмоцняцца. У панядзелак-аўторак, 7-8 снежня, пры павышаным фоне атмасфернага ціску паўднёва-ўсходні вецер пачне прыносіць паветра з Ніжняга Паволжжа, дзе ўсталявалася анамальна халоднае надвор'е. Будзе пераважна без ападкаў. Месцамі на дарогах чакаецца галалёдзіца. Тэмпература паветра ўначы складзе 1-8 градусаў марозу, па ўсходзе пры праясненнях - да мінус 10. Удзень будзе 1-6 градусаў ніжэй за нуль, у крайніх заходніх раёнах - ад нуля да плюс 2. Адчуванне холаду ўзмоцніць парывісты вецер.
Паводле папярэдніх прагнозаў сіноптыкаў, у сярэдзіне тыдня захаваецца зімовы характар надвор'я.-0-
