27 верасня, Мінск /Кар. БЕЛТА/. Пасля прафарыентацыі маладыя спецыялісты з задавальненнем размяркоўваюцца. Аб гэтым у праекце БЕЛТА "Кріана гаворыць" паведаміла начальнік галоўнага ўпраўлення арганізацыйна-кадравай работы і прафесійнай адукацыі Міністэрства аховы здароўя Вольга Калюпанава.
"Прафарыентацыя студэнтаў-медыкаў пачынаецца ўжо з першага курса. На сённяшні момант мы распрацавалі дарожныя карты прафарыентацыйнай работы па кожным універсітэце. Яны прадугледжваюць, што ўжо з 1 верасня будуць арганізоўвацца сумесныя мерапрыемствы адукацыі і аховы здароўя, практычнага звяна і ўніверсітэтаў, накіраваныя на выпускнікоў школ, каледжаў і ВНУ. Прафарыентацыйная дзейнасць прадугледжвае выезды студэнтаў медыцынскіх універсітэтаў, асабліва выпускных курсаў, на экскурсіі ў арганізацыі аховы здароўя. У мінулым годзе яны пабывалі практычна ўсюды, студэнты ўбачылі на месцах, як жыве калектыў установы, ці ёсць і якія прывабныя моманты ў кожнай цэнтральнай раённай бальніцы. Таксама на сустрэчы са студэнтамі ва ўніверсітэты прыязджалі галоўныя ўрачы цэнтральных раённых бальніц з прэзентацыямі, юнакі і дзяўчаты бачылі, што ў рэгіёнах, у малых раёнах таксама працвітае ахова здароўя, там ёсць сучасныя бальніцы, аснашчаныя найноўшым абсталяваннем. Пасля гэтага яны не палохаюцца, калі даводзіцца ехаць працаваць не ў сталіцу, а, напрыклад, у Валожын, у Вілейку або ў іншыя рэгіёны. У гэтым годзе ў нас з размеркаваннем праблем не было, людзі ведалі, куды едуць, былі знаёмы з калектывамі і з задавальненнем размяркоўваліся", - расказала Вольга Калюпанава.
Яна падкрэсліла важнасць сацыяльнага партнёрства ў гэтым пытанні. "Міністэрства аховы здароўя актыўна супрацоўнічае з беларускім прафсаюзам работнікаў аховы здароўя. Мы пачалі з тарыфнага пагаднення паміж ведамствам і прафсаюзам, унеслі шмат норм для маладых спецыялістаў. Па-першае, заканадаўча пастановай Міністэрства аховы здароўя зацверджана, што кожнаму маладому спецыялісту ідзе надбаўка 30 працэнтаў да зарплаты, урачу-інтэрну - 20 працэнтаў да зарплаты, калі гэта выпускнік-медаліст, або ён з банка даных адоранай моладзі, або стыпендыят, то яму належыць 50 працэнтаў. Таксама ў тарыфным пагадненні ў нас закладзена, што ў кожны калектыўны дагавор павінны быць унесены нормы аб дадатковай да кантракта надбаўцы ад 30 працэнтаў да 50 працэнтаў. Там жа прапісаны ад двух да пяці дзён аплачваемага водпуску бонусам. Акрамя таго, у нас ёсць сістэма настаўніцтва. У гэтым годзе мы ўпершыню замацавалі ўжо загадам Міністэрства аховы здароўя і ў калектыўныя дагаворы ўнеслі заахвочванне настаўнікаў - ад 40 працэнтаў да 60 працэнтаў. Чым лепш настаўнік адаптаваў маладога спецыяліста, тым большы ў яго працэнт надбаўкі да заработнай платы. Штогод у нас праводзіцца конкурс "Лепшы настаўнік". У гэтым годзе мы ўвялі заахвочванне граматамі і матэрыяльнымі прызамі ад прафсаюзаў. Таксама ў нас штогод праводзяцца ўвядзенні ў прафесію, дзе прафсаюзы прымаюць актыўны ўдзел з прызамі, канцэртамі, конкурсамі, каб малады спецыяліст лепш адаптаваўся ў калектыве", - праінфармавала начальнік галоўнага ўпраўлення.
Вольга Калюпанава адзначыла, што ва ўсіх такіх мерапрыемствах у аснову ставіцца маральны клімат у калектыве. "Колькі б мы не заахвочвалі, колькі б не давалі кватэр, але калі ў калектыве маральны клімат не вельмі, і кіраўнік не ўдзяляе гэтаму ўвагі, то мы не ўтрымаем маладога спецыяліста ні кватэрай, ні заработнай платай. Ён будзе старацца пайсці ў іншы калектыў. У бягучым годзе мы ўдзяляем гэтаму асаблівую ўвагу. У гэтым нам дапамагаюць розныя мерапрыемствы. Маладыя спецыялісты настолькі актыўныя: яны і помнікі добраўпарадкуюць, і ў конкурсах удзельнічаюць, у гэтым годзе для іх было праведзена "Студабачанне" - гэта такі конкурс талентаў. Прафсаюзамі вельмі актыўна праводзяцца розныя спартыўныя мерапрыемствы. Цяпер ідзе другі турнір па міні-футболе, гэтымі днямі закончыўся турнір па валейболе, дзе прынялі ўдзел 10 каманд. Мы не даём ім сумаваць. Моладзь бачыць, што ў нас актыўна. Гэта, вядома, ідзе з падачы ў першую чаргу міністра аховы здароўя і старшыні Беларускага прафсаюза аховы здароўя, якія ў аснову паставілі маральнае станаўленне маладога спецыяліста і фарміраванне ўрача - патрыёта сваёй краіны. Апошнім наватарскім падыходам цяпер у нас з'яўляецца створаны пры Міністэрстве аховы здароўя Рэспубліканскі маладзёжны савет. Іх лінія работы ў тым ліку датычыцца маладых спецыялістаў, паколькі не заўсёды малады спецыяліст адкрыецца маніторынгавай групе, прадстаўніку Міністэрства аховы здароўя, спецыялісту вобласці - для арганізацыі яны з'яўляюцца кантралёрамі, таму цяпер мы падключылі да гэтай работы маладзёжны савет. Ужо распрацаваны графікі выездаў, будуць арганізаваны сустрэчы з маладымі спецыялістамі ў нефармальнай абстаноўцы. Будуць глядзець, ці добра жыве малады спецыяліст, якое яму жыллё далі і гэтак далей", - расказала яна.-0-
Праект створаны за кошт сродкаў мэтавага збору на вытворчасць нацыянальнага кантэнту.
Фота Таццяны Матусевіч
