Забяспечыць ваенную бяспеку краіны і пераўтварыць армію. Такую задачу Аляксандр Лукашэнка паставіў з першых дзён пасля выбрання Прэзідэнтам. 1 лістапада 1994 года Міністэрства абароны пераведзена на новы штат. У 1996-м распрацаваны план ваеннай рэформы. У 2001-м прынята Канцэпцыя будаўніцтва Узброеных Сіл. З 2007-га робіцца акцэнт на інавацыях. Прыярытэт 2015-га - максімальнае рэагаванне на магчымыя выклікі і пагрозы. І, нарэшце, 2019-ы - План абароны на чарговую пяцігодку і канцэпцыя Узброеных Сіл да 2030 года. Што змянілася за столькі гадоў? Напэўна, баявы склад, колькасць, узбраенні... Але прыярытэты ваеннай палітыкі, бадай, нязменныя. Якім будзе адказ беларускай арміі на агрэсію? Ці здольны нашы распрацоўкі працверазіць патэнцыяльнага праціўніка? І чаму Беларусь не будзе ствараць заводы за мільярды долараў, каб сябе ўзброіць? Расказваем у новым выпуску YouTube-праекта БЕЛТА "Па факце: рашэнні Першага".
На пасяджэнні Савета бяспекі ў снежні 2019 года кіраўнік дзяржавы чарговы раз падкрэсліў, што беларуская армія ніколі нікому не пагражала, не пагражае і пагражаць не збіраецца. "Яна з'яўляецца інструментам недапушчэння вайны, а ў выпадку агрэсіі павінна быць здольна не толькі яе адбіць, але і нанесці непрымальны ўрон праціўніку. Асноўнае прызначэнне Узброеных Сіл заключаецца ў абароне суверэнітэту, незалежнасці і тэрытарыяльнай цэласнасці краіны", - канстатаваў Аляксандр Лукашэнка.
Прэзідэнт Беларусі зацвердзіў рашэнні на ахову дзяржаўнай граніцы ў 2023 годзе. Гэта планавае мерапрыемства, якое традыцыйна праходзіць у пачатку года. Толькі на гэты раз упершыню размова ідзе аб абароне ў паветранай прасторы. Гэту задачу Узброеныя Сілы выконвалі і раней, проста цяпер, улічваючы ваенна-палітычную абстаноўку, адказнасць у разы большая. У гісторыі суверэннай Беларусі ваенным яшчэ не даводзілася ахоўваць дзяржграніцу з дзяржавай, на тэрыторыі якой ідуць баявыя дзеянні.
Якія беларускія прадпрыемствы вырабляюць узбраенне
Абаронна-прамысловы комплекс - адзін з важнейшых высокатэхналагічных сектараў беларускай эканомікі. Рашэнне Першага - абапірацца на айчыннага вытворцу ўзбраенняў. Нашы вядомыя брэнды - "АГАТ" з аўтаматызаванымі сродкамі кіравання войскамі і зброяй, "Пеленг" і БелОМА з аптычнымі распрацоўкамі, МЗКЦ з унікальнымі цягачамі. Знакаміты "Іскандэр", дарэчы, выкананы на беларускім шасі. Яшчэ вытворчасці сродкаў РЭБ і барацьбы з дронамі.
Наколькі беларускае ўзбраенне запатрабавана за мяжой
Прадпрыемствы Дзяржкамваенпрама ў мінулым годзе экспартавалі прадукцыю ў 57 краін. І гэта ва ўмовах максімальнага знешняга націску. Аўтаматнай чаргой санкцыі стралялі па арганізацыях абароннага сектара. Так, страцілі 11 краін-партнёраў, але на фоне агульнай геаграфіі паставак не смяротна. Пераарыентавалі лагістыку, забяспечылі ўнутраны рынак. Дзяржабаронзаказ выкананы. Узброеныя Сілы атрымалі больш за 500 новых узораў розных відаў узбраення, ваеннай і спецыяльнай тэхнікі.
"Яшчэ ў канцы 2020 года мы зацвердзілі праграму па імпартазамяшчэнні для Дзяржкамваенпрама. Напрыклад, у 2022 годзе мы імпартазамясцілі дэталей, вузлоў, паслуг, работ на суму $43,5 млн. На 2023 год мы ставім задачу выйсці на ўзровень $62-64 млн. Гэта тыя дэталі і вузлы, якія мы самастойна распрацавалі і прымяняем ужо ў нашай тэхніцы", - расказаў журналістам старшыня Дзяржкамваенпрама Дзмітрый Пантус у час калегіі ведамства па выніках мінулага года.
Якія ракетныя комплексы Расія перадала Беларусі
У канцы мінулага года Расія перадала Беларусі аператыўна-тактычны ракетны комплекс "Іскандэр". Аналагаў у свеце няма. Разганяецца па бездарожжы да 70 км/гадз, можа выкарыстоўваць балістычныя і крылатыя ракеты, з вельмі высокай дакладнасцю паражаць камандныя пункты, базы, падземныя бункеры і іншыя аб'екты праціўніка. Кіраванне - на працягу ўсяго палёту. Што радуе, у комплексе ёсць беларускі складнік - шасі МЗКЦ.
"Іскандэру" ў выпадку чаго гатовы падыграць беларускі "Паланэз". Іх часам нават называюць канкурэнтамі, хоць яны ўяўляюць сабой розныя тыпы ўзбраенняў. Аб гэтым разбуральным тандэме ў адным са сваіх эфіраў расказваў наш расійскі калега Уладзімір Салаўёў. Тэлевядучы пабываў у беларускіх ваенных часцях, паразмаўляў з разлікамі і назваў такое ваеннае супрацоўніцтва "ўзаемным узбагачэннем", а не саперніцтвам.
Якую падтрымку беларуская дзяржава аказвае людзям у пагонах
Мадэрнізацыя Узброеных Сіл, а таксама падтрымка чалавека ў пагонах - нязменная палітыка дзяржавы. З гэтага года сацабарона ваенных будзе ўзмоцнена. Так, Прэзідэнт падпісаў указ аб перадачы арэнднага жылля для ваеннаслужачых ва ўласнасць. Спецыялісты падлічылі ўжо, што такім спосабам жыллёвае пытанне вырашаць каля 10 тыс. ваенных.
"Ваеннаслужачыя, як і дзяржслужачыя, у нейкай ступені ўрачы, настаўнікі, - гэта бюджэтнікі, якія выконваюць важнейшыя для краіны функцыі. І яны маюць права разлічваць на падтрымку дзяржавы, - падкрэсліў Прэзідэнт. - Гэтыя прафесіі выбіраюць не з-за вялікіх зарплат, а па прызванні, закліку сэрца, зыходзячы з высокіх маральных прынцыпаў і патрыятызму (прынамсі, з гэтага трэба зыходзіць). Накапіць на сваю кватэру маладому спецыялісту ў гэтых сферах немагчыма".
"Забеспячэнне жыллём бюджэтнікаў і асабліва людзей, якія стаяць на абароне Беларусі, асабліва цяпер, заўсёды будзе ў прыярытэце дзяржаўнай жыллёвай палітыкі. Я неаднаразова падкрэсліваў, што шматдзетныя і людзі ў пагонах - гэта нашы першачаргавікі, нават звышпершачаргавікі", - акцэнтаваў увагу Аляксандр Лукашэнка.
Якая ваенна-палітычная абстаноўка склалася каля беларускіх граніц
Нашы суседзі закрываюцца пяціметровай стальной агароджай, падкідваюць трупы бежанцаў, штучна ствараюць чэргі на граніцы, шантажыруюць санкцыямі, а яшчэ актыўна пераўзбройваюць свае арміі і сцягваюць шматтысячныя групоўкі войскаў. Напрыклад, Польшча ў гэтым годзе на ваенныя патрэбы плануе выдзеліць 4 працэнты ад ВУП. А прэм'ер Маравецкі адкрыта заяўляе аб планах вывесці краіну ў лідары па расходах на армію сярод усіх дзяржаў НАТА. Яшчэ нехта сумняваецца, што порах трэба трымаць сухім?
"Найбольшую актыўнасць праяўляе Польшча. На поўдні беларускага напрамку адбываецца фарміраванне новай механізаванай дывізіі, на поўначы і ўсходзе краіны ствараюцца кадравыя брыгады тэрытарыяльнай абароны Польшчы. Пашыраецца геаграфія закупак узбраенняў: да традыцыйных ЗША і Германіі дабавілася Паўднёвая Карэя. Замест падтрымкі свайго насельніцтва ў складанай сацыяльна-эканамічнай абстаноўцы ўрад Польшчы плануе павялічыць свой ваенны бюджэт", - праінфармаваў кіраўнік дзяржавы на нарадзе па пытаннях ваеннай бяспекі ў кастрычніку мінулага года.
Прэзідэнт падкрэсліў, што Украіна са свайго боку сцягнула да нашай граніцы групоўку да 15 тыс.: "Яна ажыццяўляе інжынернае абсталяванне блокпастоў і агнявых пазіцый, зрабіла загароды на дарожных напрамках. Словам, не проста забарыкадавалася, а выбудавала сцяну. Украіна пастаянна вядзе аптычную, радыёэлектронную, радыётэхнічную разведку нашай тэрыторыі, войскаў, аб'ектаў. Часта з парушэннем сваімі беспілотнікамі лініі дзяржаўнай граніцы. І ў той жа час украінцы перажываюць: "ах, як бы Беларусь не ўступіла ў вайну".
"Уступаць у вайну" Беларусь не збіраецца, хоць у нашай краіны сапраўды ёсць усё для таго, каб працверазіць праціўніка. Але і беларуская міралюбнасць не сінонім ахвярнасці, папярэдзіў Першы ў пачатку гэтага тыдня на пасяджэнні Савета бяспекі. У выпадку любой агрэсіі адказ будзе хуткім, жорсткім і адэкватным. Цікава, колькі яшчэ павінен паўтарыць беларускі лідар, каб яго нарэшце пачулі: наш народ даўно вычарпаў ліміт войнаў і рэвалюцый. Дабіцца міру можна толькі за сталом перагавораў, і гэтай мірнай пляцоўкай заўсёды была і застаецца Беларусь.
Паводле слоў Аляксандра Лукашэнкі, у Беларусі толькі ва ўмовах мірнага часу ў арміі ёсць 75 тыс. Але пры неабходнасці ва ўмовах вайны гэту колькасць можна нарасціць да паўмільёна. "Вайна нікому не патрэбна. Пакуль сёння няма пашырэння гэтай агрэсіі, давайце дамаўляцца аб міры. Усходні бок да гэтага гатовы", - заклікаў беларускі лідар да мірных перагавораў на сустрэчы з журналістамі 16 лютага.-0-
Праект створаны за кошт сродкаў мэтавага збору на вытворчасць нацыянальнага кантэнту.
