3 снежня, Мінск /Кар. БЕЛТА/. Удасканаленне прававых інструментаў дасць магчымасць аператыўна адказваць на выклікі ў медыяполі. Такое меркаванне выказаў міністр інфармацыі Ігар Луцкі ў час круглага стала на тэму "Сродкі масавай інфармацыі ў палітычным працэсе. Актуальныя аспекты заканадаўчага рэгулявання" ў Палаце прадстаўнікоў, перадае карэспандэнт БЕЛТА.
"Мы ўпершыню ў гісторыі суверэннай Беларусі апынуліся ў стане зацяжной, шырокамаштабнай, не намі развязанай інфармацыйнай вайны. Вайны вельмі разнастайнай па наборы прымяняемых метадаў і спосабаў яе вядзення, нацэленай не проста на нанясенне ўрону дзяржаве, а на яе знішчэнне, - сказаў Ігар Луцкі. - Па-другое, выклікі часу сёння апынуліся наперадзе дзеючага заканадаўства. Па-трэцяе, мы бачым, што з медыяполя практычна знік сектар неангажыраваных грамадска-палітычных медыярэсурсаў. Тыя, хто яшчэ ўчора яўна папракаў дзяржаўныя СМІ ў праўладнай прапагандзе, хто горда біў сябе кулаком у грудзі, сцвярджаючы, што займаецца чыстай незалежнай журналістыкай, сёння раптам ператварыліся ва ўзорна-прапагандысцкія інструменты для разбурэння дзяржавы. Назавём рэчы сваімі імёнамі - сталі непасрэднымі ўдзельнікамі інфармацыйнай вайны, адкрыта выступіўшы на баку агрэсараў".
Паводле слоў міністра, медыяландшафт за апошнія паўгода больш чым істотна змяніўся.
"Я кажу паўгода, таму што рашучыя змяненні, якія нясуць відавочную пагрозу нацыянальнай бяспецы дзяржавы, з'явіліся да прэзідэнцкіх выбараў. Цяпер мы маем справу з новай інфармацыйнай рэальнасцю, да якой, шчыра кажучы, былі не вельмі гатовы, у тым ліку і ў частцы прававога рэгулявання, - адзначыў ён. - Усе памятаюць, як крытыкавалі Беларусь за абноўлены закон аб СМІ. Але, што мы бачым праз два гады пасля яго ўступлення ў сілу? Горшыя чаканні і сумныя прагнозы не спраўдзіліся. Мы не раз прасілі апанентаў, якія захлёбваючыся крытыкавалі дакумент, прадаставіць факты пагаршэння сітуацыі з-за новай рэдакцыі закона. Але так і не дачакаліся адказу. Няма чаго прадастаўляць. Затое добра ўбачылі, наколькі закон апынуўся, так сказаць, талерантным у адносінах да тых, хто фармальна яго выконваў і ўдзельнічае ў знішчэнні сапраўды першай незалежнай беларускай дзяржавы".
Ігар Луцкі падкрэсліў, што інфармацыйная вайна, як паказвае вопыт нашых суседзяў, патрабуе іншых падыходаў.
"Ды і не толькі ў ёй справа. Сама па сабе хутказменлівая сітуацыя на медыяполі ўжо ставіць пытанне аб нарматворчых змяненнях. Мы бачым гэта на прыкладзе Германіі, Францыі, Вялікабрытаніі, Аўстрыі, Расіі і іншых краін. Адна барацьба з фэйкамі чаго каштуе. Таму ў бліжэйшай перспектыве нам трэба будзе стварыць эфектыўна дзеючы механізм аператыўнага заканадаўчага рэагавання на змяненні інфармацыйнай абстаноўкі. Мэта - максімальна хутка адказваць на выклікі і пагрозы праз удасканаленне прававых інструментаў", - дадаў ён.
Сёння ў круглым стале прымаюць удзел парламентарыі, а таксама намеснік кіраўніка Адміністрацыі Прэзідэнта Андрэй Кунцэвіч, кіраўнікі рэспубліканскіх сродкаў масавай інфармацыі, Беларускага саюза журналістаў.-0-
