17 чэрвеня, Мінск /Кар. БЕЛТА/. Старшыня Пастаяннай камісіі па адукацыі, навуцы, культуры і сацыяльным развіцці Савета Рэспублікі Віктар Лісковіч у Акадэміі кіравання прыняў удзел у рабоце дзяржаўнай камісіі па кантролі за ходам падрыхтоўкі і правядзення ўступных іспытаў ва ўстановах вышэйшай і сярэдняй спецыяльнай адукацыі ў 2022 годзе, паведамляе карэспандэнт БЕЛТА.
"У цэлым у краіне гэта сістэма выбудавана, дакладна арганізавана. Ёсць выпадкі, калі абітурыентаў выдаляюць з ЦТ за выкарыстанне смартфонаў. Але гэта літаральна лічаныя людзі. На жаль, яны не пачулі пажаданняў членаў камісіі. Думаю, гэта будзе ўрокам для ўсіх астатніх, што трэба працаваць у рамках дзеючых правіл. Хачу падкрэсліць: для абітурыентаў створаны аднолькавыя ўмовы, каб паказаць свае веды. Члены камісіі настроены добразычліва, работу сваю ведаюць", - сказаў Віктар Лісковіч.
Сенатар дадаў, сёння перад абітурыентамі стаіць важны выбар - будучай прафесіі. "Моладзі я хацеў бы пажадаць, каб яны дастойна прайшлі іспыты, паказалі свае веды. Выбралі прафесію не па суме балаў, а любімую. Таму што прафесія - на ўсё жыццё. І, самае галоўнае, каб яна была любімай і каб была карысць дзяржаве ад таго, што сёння кожны з нас робіць. Хачу яшчэ раз падкрэсліць: імкніцеся атрымаць тую прафесію, якая вам падабаецца і з якой вам будзе камфортна", - адзначыў ён.-0-
