9 ліпеня, Гомель /Кар. БЕЛТА/. Лічбавізацыя пасажырскіх перавозак чыгуначным транспартам, ІТ-тэхналогіі і здаровая канкурэнцыя прыватнага і дзяржаўнага сектараў - на гэтых момантах акцэнтаваў увагу міністр транспарту і камунікацый Аляксей Аўраменка, размаўляючы з журналістамі ў Гомелі, перадае карэспандэнт БЕЛТА.
Аляксей Аўраменка падкрэсліў, што ў цэлым работа ў сферы наладжана, аднак ёсць моманты, якім трэба ўдзяліць асаблівую ўвагу. У прыватнасці, на яго думку, гэта развіццё здаровай канкурэнцыі ў прыватным і дзяржаўным сектарах, збалансаванасць аўтамабільных і чыгуначных перавозак пасажыраў, абнаўленне рухомага саставу з улікам электрыфікацыі, а таксама актывізацыя ўкаранення IT-тэхналогій. "Аўтамабільным і чыгуначным транспартам выконваецца значная доля пасажырскіх перавозак у краіне, таму неабходна пастаяннае ўдасканаленне яго работы, у тым ліку механізма фінансавання. У плоскасці фінансавання знаходзіцца і пытанне абнаўлення рухомага саставу. Паколькі для перавозчыкаў пасажыраў яно з'яўляецца заўсёды вельмі складанай задачай, што патрабуе вялікіх капіталаўкладанняў і ўзважанага падыходу. Тым больш, калі ў сучасных умовах навука і прамысловасць асвойваюць і пашыраюць выпуск інавацыйных транспартных сродкаў на электрычнай цязе", - расказаў ён.
Паводле слоў міністра транспарту і камунікацый, важна абмеркаваць умовы для добрасумленнай канкурэнцыі і павышэння якасці аказваемых паслуг. Размова не толькі аб прыватных і дзяржаўных прадпрыемствах, але і аб аўтамабільным і чыгуначным транспарце ў цэлым. Па некаторых маршрутах ідзе паўпусты аўтобус і незагружаны поезд. Аляксей Аўраменка ўдакладніў, што, магчыма, было б мэтазгодна на асобных напрамках пакінуць чыгуначныя зносіны, актуалізуючы графікі. "А вызваленыя рэсурсы можна было б пераключыць на іншыя напрамкі. Неабходна ўстараняць існуючыя дыспрапорцыі і павышаць эфектыўнасць усіх відаў перавозак", - падкрэсліў ён. Асобна будзе прапрацавана пытанне лічбавізацыі перавозак пасажыраў на чыгунцы. У гэтым плане ёсць нямала напрацовак, уключаючы рэалізацыю білетаў праз інтэрнэт, касы самаабслугоўвання. І такі працэс маюць намер інтэнсіўна развіваць у далейшым.
У ліку важных тэм - укараненне сучасных лічбавых тэхналогій на пасажырскім транспарце, што прыводзіць як да з'яўлення і развіцця новых відаў паслуг і заснаванага на іх бізнесу, так і да змяненняў умоў канкурэнцыі на рынку перавозак пасажыраў. "Шляхі ўдасканалення сферы могуць быць розныя, але мэта для нас адна - забяспечыць бесперабойную работу пасажырскага транспарту рэспублікі, нягледзячы на прыродныя, тэхнічныя або іншыя цяжкасці", - акцэнтаваў Аляксей Аўраменка.
Тонкасці і перспектывы развіцця ўнутрырэспубліканскіх аўтамабільных перавозак пасажыраў у рэгулярных зносінах і перавозак людзей чыгуначным транспартам абмяркоўваюць сёння ў Беларускім дзяржаўным універсітэце транспарту ў Гомелі. Актуальныя пытанні ўзнімаюць прадстаўнікі транспартнай сферы (аператары і перавозчыкі), мясцовай улады, а таксама грамадскіх арганізацый, прафсаюзаў, кампаній IT-сферы і інш.
Старшыня Пастаяннай камісіі Палаты прадстаўнікоў Нацыянальнага сходу Рэспублікі Беларусь па прамысловасці, паліўна-энергетычным комплексе, транспарце і сувязі Ігар Камароўскі таксама адзначыў значнасць узнятай тэмы. "Гэта вельмі актуальныя пытанні, паколькі закранаюць перавозкі пасажыраў у рэгулярных зносінах унутры краіны, а таксама сацыяльна значны сегмент - перавозкі па рэгулюемых тарыфах. Безумоўна, у комплексе і камерцыйны транспарт, які вельмі актыўна і інтэнсіўна развіваецца ў Беларусі ў высокаканкурэнтным асяроддзі. У гэтай сферы нямала пытанняў. Яны патрабуюць вырашэння і дзяржаўнага рэгулявання, а таксама ўрэгулявання на ўзроўні дамоўленасцей паміж суб'ектамі праваадносін - заказчыкамі, аператарамі і вытворцамі транспартных паслуг. Усё гэта нацэлена на канчатковы вынік - задавальненне спажыўца транспартных паслуг", - сказаў ён.
Па выніках круглага стала будзе выпрацаваны шэраг прапаноў, накіраваных на павышэнне ўзроўню і эфектыўнасці развіцця транспартных перавозак. Дакладнае разуменне ўсіх зацікаўленых у далейшым развіцці сферы перавозак пасажыраў аўтамабільным і чыгуначным транспартам і выпрацаваныя рэкамендацыі стануць асновай для пакета нарматыўных прававых актаў.-0-
