24 лістапада, Мінск /Кар. БЕЛТА/. Рэгіянальныя ўлады павінны больш удзельнічаць у фінансавай падтрымцы СМІ. Аб гэтым заявіў журналістам першы намеснік міністра інфармацыі Павел Лёгкі, перадае карэспандэнт БЕЛТА.
"Удзел рэгіянальных улад у фінансавай падтрымцы сваіх сродкаў масавай інфармацыі - гэта хутчэй рэдкасць і выключэнне з правіл, чым стабільная інфармацыйная палітыка. Я хачу нагадаць нашым паважаным рэгіянальным кіраўнікам, што ва ўказе нумар 192 вызначаны магчымасці па падтрымцы друкаваных выданняў. Можна заключаць з імі дагаворы і на гэтай аснове дапамагаць", - падкрэсліў Павел Лёгкі.
Сёння шмат гавораць аб новым фармаце або нават функцыянале рэгіянальных СМІ. "Да гэтага нас падштурхоўвае ў тым ліку эканамічная сітуацыя. Мы бачым, што скарачаюцца тыражы друкаваных выданняў, у першую чаргу раённых. Спад у сярэднім складае каля 4-5 працэнтаў у год. На жаль, гэта стала тэндэнцыяй. І гэта падштурхоўвае выданні да пошуку крыніц фінансавання", - адзначыў першы намеснік міністра.
Паводле яго слоў, выданням неабходна шукаць новыя фарматы заработку. "І гэта ў прынцыпе нармальна. Такі характар мае не толькі беларускі медыйны рынак, гэта глабальная тэндэнцыя. Тыя выданні, якія працавалі раней і зараблялі на паперы, вымушаны шукаць новыя магчымасці ў інтэрнэце. Буйнейшыя сусветныя выданні актыўна пераходзяць на падпісную мадэль фінансавання праз электронную падпіску", - дадаў Павел Лёгкі.-0-
