Лебедзеў: наглядальнікі ад СНД наведалі ўжо ўсе рэгіёны Беларусі

23 студзеня, Мінск /Кар. БЕЛТА/. Наглядальнікі ад СНД наведалі ўжо ўсе рэгіёны Беларусі, заявіў кіраўнік місіі наглядальнікаў ад СНД на выбарах Прэзідэнта Беларусі Сяргей Лебедзеў у час наведвання Жодзінскай гарадской камісіі па выбарах Прэзідэнта Рэспублікі Беларусь, перадае карэспандэнт БЕЛТА.

Місія наглядальнікаў ад СНД пачала маніторынг 18 снежня. "Цяпер місія ўзрастае. Колькасць доўгатэрміновых наглядальнікаў у яе складзе - 40 чалавек. Гэта ў асноўным супрацоўнікі Выканкама СНД, дыпламаты. Мы наведалі ўжо ўсе вобласці. Зразумела, 100 працэнтаў участкаў мы не можам ахапіць, але даволі вялікую колькасць паглядзелі, сустракаліся з кіраўнікамі абласных і ўчастковых выбарчых камісій. Асабліва актыўна пачалі маніторынг са стартам датэрміновага галасавання 21 студзеня. І шчыра скажу, парадаваліся гэтай актыўнасці. У першы дзень амаль 8 працэнтаў па рэспубліцы, учора - амаль 18 працэнтаў ужо. Гэта сведчыць аб тым, што для грамадзян Беларусі не ўсё роўна, каго яны выберуць", - сказаў Сяргей Лебедзеў.

"У склад нашай інтэрнацыянальнай групы наглядальнікаў уваходзяць наглядальнікі з сямі краін СНД. Гэта кіраўнікі Цэнтральных выбарчых камісій, парламентарыі вядомыя, добрая група наглядальнікаў у складзе Міжпарламенцкай асамблеі СНД, вядомыя дыпламаты і супрацоўнікі пасольстваў краін СНД. Людзі вопытныя. Таму мы гаворым, што нашы ацэнкі аб'ектыўныя. Больш таго, я падкрэсліваю заўсёды пры размове з прэсай: наш погляд - глыбокі, аб'ектыўны і добразычлівы. Самае галоўнае, каб арганізацыя выбараў адпавядала беларускаму заканадаўству", - дадаў кіраўнік місіі.