1 чэрвеня, Мінск /Кар. БЕЛТА/. Краінам СНД важна аб'яднаць намаганні ў процідзеянні агрэсіўнаму знешняму націску. Аб гэтым журналістам заявіў генеральны сакратар СНД Сяргей Лебедзеў, перадае карэспандэнт БЕЛТА.
1 чэрвеня ў Мінску пройдзе 52-е пасяджэнне Савета кіраўнікоў органаў бяспекі і спецслужбаў дзяржаў - удзельніц СНД. Кіраўнікі дэлегацый ушанавалі подзвіг савецкага народа ў гады Вялікай Айчыннай вайны і ўсклалі кветкі да манумента Перамогі.
"Мінск не дарэмна называецца сталіцай Садружнасці. Тут рэгулярна праходзяць многія пасяджэнні і сустрэчы, якія прысвечаны нашаму супрацоўніцтву і ўзаемадзеянню. Сёння, ва ўмовах грубага і агрэсіўнага націску на Беларусь, Расію і іншыя краіны СНД, гэта асабліва актуальна. Нам вельмі важна аб'яднаць намаганні ў процідзеянні гэтым пагрозам і націску, каб абараніць суверэнітэт і незалежнасць краін Садружнасці", - сказаў Сяргей Лебедзеў.
Як адзначыў генеральны сакратар СНД, цяпер на тэрыторыі Беларусі і Расіі назіраюцца спробы тэрактаў і дыверсій. "Кіраўнікі спецслужбаў і органаў бяспекі сабраліся, каб абмеркаваць сумесныя меры па процідзеянні гэтым новым выклікам і пагрозам. Спадзяюся, што на сённяшнім пасяджэнні, на якім разгледзяць многія пытанні, звязаныя з процідзеяннем тэрарызму і замахам на наш суверэнітэт, будуць прыняты рашэнні, якія садзейнічаюць умацаванню нашай бяспекі", - рэзюмаваў Сяргей Лебедзеў.-0-
