9 кастрычніка, Мінск /Кар. БЕЛТА/. Асабісты прыём грамадзян з'яўляецца адной з самых эфектыўных форм работы ўлады з людзьмі, што дае магчымасць зразумець зрэз праблем, якія сапраўды хвалююць жыхароў краіны. Аб гэтым кіраўнік Адміністрацыі Прэзідэнта Дзмітрый Крутой заявіў 9 кастрычніка журналістам па выніках праведзенага ім у Мінску прыёму грамадзян, перадае карэспандэнт БЕЛТА.
Цяперашні прыём, паводле яго слоў, пацвярджае тыя трэнды, якія склаліся за апошнія некалькі гадоў. Па-ранейшаму на першым месцы праблемы, звязаныя з ЖКГ. Зрэшты, яны неаднародныя, апошнім часам узрасла колькасць зваротаў, звязаных з правядзеннем капітальных рамонтаў, няхваткай спецыялістаў для своечасовага правядзення работ і якасцю рамонту.
Другі блок пытанняў, якія закраналіся ў час прыёму, датычыўся дзейнасці садоўніцкіх таварыстваў. Гэта сфера была дадаткова ўрэгулявана ўказам кіраўніка дзяржавы, які ўступіць у сілу ў поўным аб'ёме з 2025 года. "Многія таварыствы да гэтага цяпер рыхтуюцца. Народ там таксама розны. Нехта недзе нешта недачуў, недастаткова зразумеў. Таму растлумачальная работа вельмі важная. Даводзіцца карпатліва тлумачыць усе асаблівасці, навелы заканадаўства. У цэлым прыемна, што на 90-95 працэнтаў грамадзяне падтрымліваюць гэтыя змяненні", - адзначыў кіраўнік Адміністрацыі Прэзідэнта.
Адміністрацыя Прэзідэнта штогод акумулюе тысячы зваротаў грамадзян, размяркоўваючы іх па тэматычных блоках, фарміруючы аналітычныя даныя аб тым, якія сферы выклікаюць найбольшыя нараканні з боку людзей. "Гэта адна з самых эфектыўных форм работы, што дае магчымасць лепш зразумець зрэз праблем, якія рэальна хвалююць нашых людзей, - сказаў Дзмітрый Крутой наконт важнасці правядзення асабістых прыёмаў грамадзян. - Калі непасрэдна сустракаешся, бачыш, хто запісаўся на прыём, то можна зверыць з той аналітыкай, якую чытаеш".
Як адзначыў Дзмітрый Крутой, у час сустрэчы важна тлумачыць жыхарам Мінска, што ў сталіцы за апошнія 4 гады ў два разы вырас аб'ём штогод праводзімых работ, звязаных з капрамонтам. Для забеспячэння якасці да такіх работ прыцягваюць у асноўным дзяржаўныя кампаніі.
"З прыватнікамі, скажу сумленна, было вельмі шмат праблем, скаргаў. Таму горад поўнасцю перафармаціраваў усю сістэму, і цяпер гэта дзяржкампаніі ў асноўным", - удакладніў кіраўнік Адміністрацыі Прэзідэнта. Аднак з прычыны ўсё большых аб'ёмаў работ па капрамонце патрабуецца вырашыць шэраг арганізацыйна-тэхнічных момантаў. Паводле яго слоў, людзі, калі чуюць ад чыноўнікаў такія растлумачэнні, з разменнем ставяцца да сітуацыі. "Яны бачаць, што выраслі аб'ёмы капрамонту, добраўпарадкавання, людзі гатовы нават пачакаць. Але ёсць нестандартныя выпадкі, якія патрабуюць індывідуальных рашэнняў, не прадугледжаных заканадаўчымі актамі. Таму даводзіцца ў рамках прыёму некалькі органаў улады каардынаваць і знаходзіць нестандартнае рашэнне", - сказаў Дзмітрый Крутой.
Яшчэ адна частка зваротаў закранала работу суб'ектаў рэальнага сектара эканомікі. На асабістым прыёме кіраўніка Адміністрацыі Прэзідэнта былі кіраўнікі некалькіх прадпрыемстваў прыватнай формы ўласнасці, якія рэалізуюць інвестыцыйныя праекты. Праблемы, з якімі яны звярнуліся, былі ў асноўным арганізацыйна-тэхнічнага характару, і іх удалося адразу вырашыць. Напрыклад, было заяўлена аб намеры маштабіравацца, выйсці на экспарт, у тым ліку на рынкі Афрыканскага кантынента, павялічыць у разы аб'ёмы вырабляемай прадукцыі. Адпаведна, для рэалізацыі гэтых планаў патрэбны дадатковыя памяшканні, плошчы. "З мясцовымі органамі ўлады мы практычна адразу ж знайшлі рашэнне, - звярнуў увагу Дзмітрый Крутой. - Прыемна, што прыватны бізнес, нягледзячы на знешні націск, вельмі актыўны, развіваецца, ініцыюе новыя інвестпраекты. І чыноўнікі, якія прысутнічалі (Мінскага, Віцебскага аблвыканкамаў і Мінскага гарвыканкама), поўнасцю падтрымліваюць бізнесменаў. Тут жа ў рамках прыёму знаходзяць усе неабходныя рашэнні".-0-
Фота Мікалая Пятрова
Падпісвайцеся на нас у
