1 чэрвеня, Мінск /Кар. БЕЛТА/. "Яркія фарбы дзяцінства" - пад такім дэвізам Беларускі дзіцячы фонд святкуе Міжнародны дзень абароны дзяцей. Аб гэтым карэспандэнту БЕЛТА паведамілі ў фондзе.
У гэтым годзе Беларускі дзіцячы фонд адзначае свята 35-ы раз. Традыцыйна яго цэнтральны офіс, абласныя і раённыя аддзяленні праводзяць дабрачынныя мерапрыемствы для сірот, дзяцей-інвалідаў і дзяцей, якія апынуліся ў складанай жыццёвай сітуацыі.
25 мая ў Дзіцячым фондзе пачала працаваць грамадская прыёмная. Штодзень спецыяліст адказвае на пытанні бацькоў, апекуноў, педагогаў па выхаванні і здароўі дзяцей, іх правах і сацыяльных гарантыях. У грамадскай прыёмнай дзяжураць натарыус, урач, юрыст, псіхолаг, спецыяліст па аздараўленні і санаторна-курортным лячэнні, па сацыяльнай і выхаваўчай рабоце.
У перадсвяточныя дні два дзіцячыя дамы сямейнага тыпу і адна шматдзетная сям'я Віцебскай вобласці атрымалі ў падарунак полікарбанатныя цяпліцы для сумеснай працы з дзецьмі. "Сем'і будуць вырошчваць зелень і агародніну для свайго стала. Працоўнае выхаванне - важная частка сацыялізацыі, выхавання дзяцей і падрыхтоўкі іх да будучага самастойнага жыцця", - расказалі ў фондзе.
"Дзіцячы фонд прадоўжыў аказваць дапамогу дзвюм сем'ям з Гродна і Віцебскай вобласці, у якіх выхоўваюцца малышы з цяжкімі захворваннямі страўнікава-кішачнага тракта. Мы перадалі ім спецыялізаванае харчаванне, медыкаменты, вітамінныя комплексы на Br55 тыс. Акрамя таго, на святкаванне Міжнароднага дня абароны дзяцей у Маскву накіравалася дэлегацыя сірот з дзіцячых дамоў сямейнага тыпу Смаргоні і Смаргонскага раёна. Дзеці ўжо наведалі Траццякоўскую галерэю, музей Маскоўскага Крамля, пазнаёміліся з дзецьмі з рэгіёнаў Расіі і іншых краін СНД. А сёння іх чакае святочны канцэрт у Вялікім тэатры", - дадалі ў фондзе.
Напярэдадні 1 чэрвеня Дзіцячы фонд павіншаваў 180 дзяцей, якія праходзяць курс аднаўлення пасля цяжкіх захворванняў у Рэспубліканскай дзіцячай бальніцы медыцынскай рэабілітацыі. Дырэктар Беларускага дзіцячага фонду Аляксандр Трухан уручыў бальніцы падарунак - сертыфікат на Br2500 на набыццё абсталявання для дзіцячай гульнявой пляцоўкі.
Сёння сумесна з Мінскім дзяржаўным палацам дзяцей і моладзі фонд арганізаваў для дзяцей сталіцы, у тым ліку выхаванцаў дзіцячых дамоў сямейнага тыпу, свята "Дзяцінства - гэта я і ты". Дзеці змогуць прыняць удзел у конкурсах, квізах і актыўных гульнях, а таксама паспрабуюць праграмаваць робатаў.
Акрамя таго, менавіта сёння Беларускі дзіцячы фонд па шматгадовай традыцыі аб'явіць лаўрэатаў прэміі "Сябар дзяцей", што прысуджаецца дарослым, якія шмат гадоў бескарысліва і плённа прапрацавалі з дзецьмі, унеслі значны ўклад у абарону правоў і інтарэсаў дзяцей, і прэміі імя Зінаіды Тусналобавай-Марчанка, якая ўручаецца сем'ям, што выхоўваюць 5 і больш біялагічных дзяцей у любові, узаемапавазе і працавітасці.
"Міжнародны дзень абароны дзяцей - нагода яшчэ раз нагадаць грамадству аб неабходнасці клопату і ўвагі да дзяцей. Паколькі наша задача - выгадаваць іх выхаванымі, адукаванымі, здаровымі, паважлівымі да сваіх сем'яў, настаўнікаў, гісторыі і сваёй краіны. Мы павінны зрабіць усё, каб дзеці адчувалі сябе пад надзейнай аховай, атрымалі добры старт у жыцці", - дадалі ў Дзіцячым доме.-0-
