18 сакавіка, Мінск /Кар. БЕЛТА/. Міністр юстыцыі Алег Сліжэўскі па выніках нарады ў кіраўніка дзяржавы расказаў журналістам аб рыхтуемых заканадаўчых навацыях у сферы адвакацкай дзейнасці, перадае карэспандэнт БЕЛТА.
"Міністэрствам юстыцыі падрыхтаваны праекты заканадаўчых актаў, якія карэкціруюць заканадаўства аб адвакатуры і адвакацкай дзейнасці, - адзначыў міністр. - Іх мэта - умацаванне кадравага патэнцыялу адвакатуры, умацаванне прынцыпу законнасці ў рабоце адвакатаў, павышэнне якасці і даступнасці адвакацкай дзейнасці".
У прыватнасці, законапраектам прадугледжваецца скасаванне абавязковага трохгадовага стажу па юрыдычнай спецыяльнасці для асоб, якія маюць намер стаць адвакатамі.
"Некалькі гадоў таму гэта норма была ўведзена ў заканадаўства, аднак на сённяшні дзень калегіі адвакатаў ставяць пытанне, што прыток новых кадраў у адвакатуру знізіўся, больш таго, якасць асоб, якія падаюць свае заявы на атрыманне адвакацкай ліцэнзіі, апошнія тры гады пагаршаецца. І мы гэта бачым па працэнту станоўчай здачы кваліфікацыйнага экзамену, - растлумачыў кіраўнік Мінюста. - Каб выправіць гэту сітуацыю, мы прапануем скасаваць абавязковы трохгадовы стаж для звароту за стажыроўкай і атрыманнем ліцэнзіі адвакатаў. Гэта дасць магчымасць забяспечыць прыток добрых выпускнікоў юрыдычных ВНУ ў адвакатуру, зразумела, з праходжаннем стажыроўкі і наступнай паспяховай здачай экзамену".
Акрамя таго, паводле слоў міністра, прапануецца спрошчаны парадак праходжання кваліфікацыйнага экзамену і ўступлення ў адвакатуру для асоб, якія маюць значны вопыт работы ў судах, праваахоўнай сістэме, органах юстыцыі.
Што датычыцца павышэння даступнасці і якасці адвакацкіх паслуг, уносіцца прапанова пашырыць пералік катэгорый і пытанняў, па якіх адвакацкія паслугі будуць аказвацца грамадзянам (у першую чаргу маламаёмным) за кошт калегіі адвакатаў.
Міністр таксама абазначыў яшчэ адну праблему, на вырашэнне якой будуць накіраваны заканадаўчыя навацыі. "Статус адваката прадугледжвае высокую павагу, шанаванне норм заканадаўства і тое, што адвакат як прадстаўнік юрыдычнай прафесіі павінен паказваць прыклад правапаслухмяных паводзін. Тым не менш асобныя адвакаты дазваляюць сабе выходзіць за рамкі паўнамоцтваў, якія ім прадастаўлены заканадаўствам аб адвакатуры, дазваляюць сабе парушаць, пераступаць закон. Часам гэта робіцца груба і дэманстрацыйна, што патрабуе прынцыповай ацэнкі", - падкрэсліў ён.
"Практыка паказала, што не заўсёды належным чынам органы адвакацкага самакіравання рэагуюць на такія недапушчальныя дзеянні з боку адвакатаў, - прадоўжыў Алег Сліжэўскі. - У сувязі з гэтым у законапраект уключана норма, якая скасоўвае дысцыплінарныя камісіі і ўскладае пытанні разгляду выпадкаў, якія патрабуюць адказнасці адвакатаў, на саветы калегіі адвакатаў. Гэта таксама калегіяльныя органы кіравання, якія складаюцца з адвакатаў".
Паводле слоў міністра, на нарадзе ў Прэзідэнта абмяркоўвалася таксама мэтазгоднасць работы адвакатаў у існуючых арганізацыйна-прававых формах - гэта юрыдычныя кансультацыі, адвакацкія бюро і ажыццяўленне адвакацкай дзейнасці індывідуальна.
"Часта ўзнікаюць нараканні як з боку грамадзян, так і з боку судоў на якасць аказваемых адвакатамі адвакацкіх паслуг. Часам адвакаты, якія ўсё жыццё працавалі ў сферы гаспадарчага, эканамічнага права, дзеля аднаго выпадку выходзяць у крымінальны або адміністрацыйны працэс, не арыентуюцца ў гэтым працэсе і, па сутнасці, парушаюць нормы працэсуальнага заканадаўства, што, безумоўна, не лепшым чынам уплывае на аўтарытэт адвакатуры", - абазначыў сутнасць праблемы Алег Сліжэўскі.
У якасці магчымага варыянта яе вырашэння прапаноўвалася заканадаўча замацаваць, што адвакаты, якія ажыццяўляюць дзейнасць індывідуальна, і адвакаты, якія працуюць у адвакацкіх бюро, павінны спецыялізавацца на аказанні паслуг па грамадзянскіх і эканамічных справах. Адвакаты, якія працуюць у юрыдычных кансультацыях, могуць аказваць адвакацкія паслугі па ўсіх напрамках.
Аднак пакуль канчатковае рашэнне па гэтым пытанні не прынята. "Гэта тое пытанне, якое на працягу бліжэйшых дзён будзе прапрацоўвацца, і будзе ўнесена канчатковая прапанова, - сказаў міністр. - Асноўны тэзіс, што ўсе адвакаты павінны працаваць у аднолькавых умовах".-0-
