25 кастрычніка, Мінск /Кар. БЕЛТА/. Камітэт дзяржкантролю выявіў парушэнні дысцыпліны цэн у кожным чацвёртым правераным гандлёвым аб'екце, паведамілі БЕЛТА ў прэс-службе КДК.
Парушэнні ўстаноўлены ў 494 з 2044 гандлёвых аб'ектаў, правераных у студзені-верасні. Так, падчас маніторынгу ў сталічных гандлёвых аб'ектах буйных рытэйлераў выяўлена завышэнне гандлёвай надбаўкі на свежыя агуркі, таматы, яблыкі на 19,5-25 працэнтаў, свініну і таматы - на 4-5,3 працэнта.
У Гомельскай вобласці ў двух магазінах адной камерцыйнай структуры гандлёвая надбаўка на цукар складала 29,5 працэнта замест устаноўленай заканадаўствам 15 працэнтаў; рыс - 61,5 працэнта, аўсяныя камякі - 72 працэнты, проса - 90 працэнтаў, макаронныя вырабы - 57 працэнтаў (замест 30); алей - 33-42 працэнты (замест 25); бядро кураняці-бройлера - 28,3 працэнта і тушку кураняці-бройлера - 50 працэнтаў (замест 20).
У Талачынскім раёне ў гандлёвым павільёне індывідуальнага прадпрымальніка пры фарміраванні рознічных цэн на вараныя каўбасы, сардэлькі і сасіскі з мяса куранят-бройлераў прымянялася гандлёвая надбаўка ў памеры 40 працэнтаў пры ўстаноўленым максімуме 20 працэнтаў, на смятану - 20 працэнтаў (15).
"Некаторыя суб'екты гаспадарання спрабуюць абысці патрабаванні заканадаўства шляхам устанаўлення больш высокіх цэн на нібыта новыя віды вырабаў. Так, дабаўленне да наймення прадукцыі аднаго слова прывяло да розніцы адпускной цаны тушкі кураняці-бройлера да 15 працэнтаў. З мэтай выключэння такіх фактаў Камітэт дзяржкантролю накіраваў у Савет Міністраў прапановы аб прыняцці мер рэагавання, а таксама аб унясенні адпаведных змяненняў у заканадаўства. Падчас маніторынгаў устаноўлены і іншыя парушэнні: адсутнасць у продажы тавараў, прадугледжаных асартыментнымі пералікамі; парушэнне санітарна-эпідэміялагічных норм, патрабаванняў тэхнічных рэгламентаў", - расказалі ў КДК.
Па выніках кантрольна-аналітычных мерапрыемстваў суб'ектам гаспадарання накіравана 895 рэкамендацый аб устараненні выяўленых парушэнняў, 49 арганізацый аштрафавана на агульную суму 4,8 млн рублёў. Да дысцыплінарнай і адміністрацыйнай адказнасці прыцягнута 566 чалавек.
Таксама ў Камітэце дзяржкантролю адзначылі, што на рынку не назіраецца дэфіцыту прадуктаў харчавання. Як правіла, перабоі з пастаўкамі асобных відаў тавараў абумоўлены неналежнай арганізацыяй работы з боку вытворцаў і суб'ектаў гандлю.
Паводле статыстычных даных, у Беларусі рознічны тавараабарот у студзені - верасні бягучага года склаў 43,6 млрд рублёў, або 100,7 працэнта да ўзроўню адпаведнага перыяду мінулага года ў супастаўных цэнах, тавараабарот грамадскага харчавання - 2,3 млрд рублёў (116,5 працэнта).-0-
