17 верасня, Мінск /Кар. БЕЛТА/. Дзень народнага адзінства стане для беларусаў яшчэ адной нагодай усвядоміць агульнасць нашых думак і жаданняў. Не мімалётных, а тых, што аб'ядноўваюць нас праз стагоддзі: адзінства, незалежнасць і стваральнасць. Такім меркаваннем з карэспандэнтам БЕЛТА падзялілася міністр працы і сацыяльнай абароны Ірына Касцевіч.
"Мы, беларусы, - гэта адно сэрца і адна сям'я. А значыць - адзіная краіна. Бясспрэчна, мы ўсе розныя, але нашы сэрцы б'юцца ў адным рытме. Таму ўсё, што мы робім, павінна ісці выключна на карысць родных, сваякоў, народа, а значыць - і ўсёй дзяржавы", - сказала Ірына Касцевіч.
Яна адзначыла, што аснову народнага адзінства нашы продкі закладвалі стагоддзямі. "На жаль, іх лёсы былі звязаны са страшнымі падзеямі: вайна, разруха, голад. Кожная беларуская сям'я ўнесла вялікі ўклад у наша мірнае жыццё. Яны змаглі перамагчы таму, што былі адзіныя. Цяпер перад намі стаіць задача не толькі зберагчы тыя каштоўнасці, традыцыі і дасягненні, якія нам дасталіся ў спадчыну, але і прымножыць іх і перадаць нашым дзецям, унукам і праўнукам пад сцягам адзінства", - дадала міністр.
Да свята Міністэрства працы і сацыяльнай абароны запускае галіновую эстафету аб дзейнасці арганізацый ведамства "Адзінства ў нашых сэрцах", якая пройдзе з 17 верасня па 4 лістапада. Гэта магчымасць, з аднаго боку, расказаць аб асаблівасцях работы сацыяльных устаноў, праектах, якія рэалізуюцца ў іх, абмяняцца навацыямі з калегамі. А з іншага, наведвальнікі сацыяльных устаноў таксама змогуць падзяліцца меркаваннем аб паслугах, якія яны атрымліваюць у тэрытарыяльных цэнтрах, расказаць аб жыцці ў дамах-інтэрнатах. З гэтай мэтай установы сацыяльнага абслугоўвання створаць кароткія відэаролікі. Першымі, 17 верасня, аб сваім вопыце раскажуць арганізацыі Віцебскай вобласці.-0-
