27 сакавіка, Мінск /Кар. БЕЛТА/. Да вырашэння пытанняў здароўя і вучобы студэнтаў трэба падыходзіць індывідуальна, адзначыў міністр адукацыі Ігар Карпенка на нарадзе па выніках праведзенага Нацыянальным прэс-цэнтрам стрыму для студэнтаў, паведамляе БЕЛТА са спасылкай на сайт міністэрства.
Усе пытанні, якія задалі студэнты, узяты пад увагу. Паводле слоў кіраўніка ведамства, неабходна ўзважана скарэкціраваць работу ўсіх устаноў адукацыі і абавязкова выконваць рэкамендацыі міністэрстваў аховы здароўя і адукацыі.
Ігар Карпенка лічыць, што ў вырашэнні пытанняў, якія датычацца здароўя, вучобы, пражывання навучэнцаў і студэнтаў, работы выкладчыкаў і ўсіх супрацоўнікаў навучальных устаноў, патрэбны індывідуальны падыход. У інтэрнатах няўхільна павінен захоўвацца прапускны рэжым.
Міністр нагадаў, што праведзены ўвесь комплекс дзеянняў, накіраваны на прафілактыку, мінімізацыю кантактаў у сістэме адукацыі, - ад адмены або пераносу на больш познія тэрміны масавых мерапрыемстваў да карэкціроўкі графікаў заняткаў. ВНУ перанеслі час пачатку заняткаў, каб раздзяліць патокі пасажыраў у грамадскім транспарце, якія едуць на працу і вучобу.
Нарада адбылася з удзелам рэктараў вышэйшых навучальных устаноў, начальнікаў упраўленняў адукацыі абласцей і камітэта па адукацыі Мінгарвыканкама.-0-
