17 верасня, Мінск /Кар. БЕЛТА/. Правядзенне IV Рэспубліканскага конкурсу прафесійнага майстэрства па міжнародных стандартах WorldSkills Belarus 2020 на тэрыторыі Кітайска-беларускага індустрыяльнага парка "Вялікі камень" вельмі сімвалічна, заявіў сёння міністр адукацыі Ігар Карпенка ў час наведвання конкурсных пляцовак, паведамляе карэспандэнт БЕЛТА.
"Конкурс ужо стаў традыцыйным. Але тое, што ён праводзіцца на тэрыторыі Кітайска-беларускага індустрыяльнага парка "Вялікі камень", лічу вельмі важным. Тут сканцэнтраваны сучасныя інавацыйныя вытворчасці. Конкурс паказвае, што адукацыя павінна быць бліжэй да інавацыйных пляцовак", - сказаў Ігар Карпенка.
Міністр адзначыў, што ніводная суперсучасная вытворчасць не можа абысціся без прафесійных кадраў. "Правядзенне WorldSkills Belarus на тэрыторыі гэтай пляцоўкі - першая прыступка да таго, што тут павінна з'явіцца і адукацыйная інфраструктура, дзе будуць рыхтаваць кадры, у тым ліку для гэтых інавацыйных вытворчасцей. Мы вядзём сур'ёзныя перагаворы з Міністэрствам адукацыі Кітая, іншымі зацікаўленымі аб стварэнні на тэрыторыі "Вялікага каменя" філіяла адной з кітайскіх ВНУ, дзе змогуць вучыцца і нашы студэнты", - расказаў ён.
Паводле слоў Ігара Карпенкі, конкурс прафесійнага майстэрства, у якім удзельнічаюць маладыя прафесіяналы - навучэнцы прафесійна-тэхнічных і сярэдніх спецыяльных навучальных устаноў, чарговы раз дэманструе, што ў нашай краіне ёсць магутны чалавечы патэнцыял, сістэма падрыхтоўкі кадраў і ўзаемадзеянне з заказчыкамі кадраў. "І мы бачым перспектывы развіцця гэтага напрамку, запатрабаванасць кадраў на рынку працы. У гэтым годзе амаль 330 канкурсантаў дэманструюць сваё майстэрства па 47 кампетэнцыях. А пачыналі мы некалі са 150 чалавек, значыць прырастаем з кожным годам. Акрамя таго, праводзяцца спаборніцтвы для юніёраў 10-17 гадоў", - звярнуў увагу міністр.
IV Рэспубліканскі конкурс прафесійнага майстэрства WorldSkills Belarus 2020 завершыцца 18 верасня. Напярэдадні праводзіліся адборы на ўзроўні навучальных устаноў, рэгіянальныя чэмпіянаты. У выніку для ўдзелу ў нацыянальным этапе сфарміраваны каманды ад кожнай вобласці. Канкурсанты дэманструюць сваё майстэрства ў галіне будаўнічых, вытворчых, інжынерных, інфармацыйных і камунікацыйных тэхналогій, транспарту і лагістыкі, сацыяльных і персанальных паслуг, творчых прафесій і моды. На палях рэспубліканскага спаборніцтва праходзіць конкурс па асновах прафесійнай падрыхтоўкі сярод школьнікаў Junior Skills.-0-
