14 лютага, Мінск /Кар. БЕЛТА/. Пры рабоце над новым КоАП адміністрацыйныя правапарушэнні прапануецца разбіць на некалькі асноўных катэгорый у залежнасці ад іх цяжкасці, паведаміў журналістам міністр юстыцыі Алег Сліжэўскі, перадае карэспандэнт БЕЛТА.
"Будзе зменена катэгарызацыя адміністрацыйных правапарушэнняў. Прапануецца ўвесці тры катэгорыі - правіннасці (якія не ўяўляюць сабой вялікай грамадскай небяспекі і прадугледжваюць нязначныя санкцыі, такія як папярэджанне, вусную заўвагу або штраф да 10 БВ), значныя і грубыя правапарушэнні. Умоўна тры катэгорыі, якія могуць змяняцца па назвах і па падыходах, але пакуль разглядаюцца такія варыянты", - сказаў Алег Сліжэўскі.
Пры гэтым аднясенне да той ці іншай катэгорыі будзе ўплываць і на тэрмін, пасля заканчэння якога чалавек будзе лічыцца не падпадаючым пад адміністрацыйнае спагнанне. Напрыклад, за правіннасць адразу ж пасля вынясення папярэджання, аб'яўлення вуснай заўвагі або выплаты штрафу будзе лічыцца, што чалавек не прыцягваўся да адказнасці. Па другой катэгорыі, плануецца, гэты тэрмін будзе складаць паўгода, па трэцяй, як і сёння, - год.
Акрамя таго, разглядаецца пытанне аб прымяненні так званых стымулюючых скідак пры выплаце штрафу. "Калі сёння ў выпадку нявыплаты штрафу на працягу некаторага часу яго памер можа быць павялічаны, то прапануецца прымяніць супрацьлеглы падыход, - сказаў міністр. - Калі чалавек аплачвае штраф адразу або на працягу ўстаноўленага заканадаўствам часу, напрыклад, тыдня, то робіцца нейкая скідка". Такі падыход, як чакаецца, будзе стымуляваць грамадзян да добраахвотнай і аператыўнай аплаты.
На сёння падрыхтаваны ўжо асноўныя прапановы па карэкціроўцы Агульнай часткі Кодэкса аб адміністрацыйных правапарушэннях. Усе прапановы, у тым ліку названыя, яшчэ будуць абмяркоўвацца рабочай групай, рэзюмаваў Алег Сліжэўскі.
Як паведамлялася, распараджэннем Прэзідэнта Беларусі ад 17 снежня 2019 года нумар 247рп для падрыхтоўкі комплексных прапаноў па карэкціроўцы Кодэкса аб адміністрацыйных правапарушэннях створана міжведамасная экспертная камісія. У яе склад увайшлі работнікі Вярхоўнага і Канстытуцыйнага судоў, Генеральнай пракуратуры, Камітэта дзяржаўнага кантролю, міністэрстваў юстыцыі, унутраных спраў, па падатках і зборах, іншых ведамстваў, прадстаўнікі парламента, а таксама навуковай супольнасці.-0-
