24 снежня, Мінск /Кар. БЕЛТА/. Работнікі Камітэта дзяржаўнага кантролю на чале са старшынёй КДК Васілём Герасімавым сёння далучыліся да марафону добрых спраў рэспубліканскай акцыі "Нашы дзеці", паведамілі карэспандэнту БЕЛТА ў прэс-службе ведамства.
Для прыкладна 60 выхаванцаў сталічнага дзіцячага дома нумар 3 (ад самых маленькіх да старшакласнікаў) сёння добрымі чарадзеямі сталі прадстаўнікі кіраўніцтва Камітэта дзяржкантролю, які некалькі гадоў дапамагае ўстанове, і іншыя шэфы: кіраўніцтва Міністэрства прыродных рэсурсаў і аховы навакольнага асяроддзя, прадстаўнікі "Белінвестбанка", раённага аддзела Следчага камітэта.
Дзеці разам з гасцямі дапамагалі казачным персанажам збіраць асколкі навагодняга гадзінніка, які выкрала Баба Яга. У рэшце рэшт гадзіннік прабіў 12 разоў, абвясціўшы прыход Новага года, Дзеда Мароза і час здзяйснення жаданняў.
Выхаванцам дзіцячага дома перадалі чатыры новыя планшэты ад кантрольнага ведамства і Дэпартамента фінансавых расследаванняў, а таксама наборы ласункаў. Другая частка падарунка - дзіцячая бібліятэка з мастацкіх кніг і пазнавальнай літаратуры. Да падарункаў Васіль Герасімаў дадаў пажаданні і добрыя словы.-0-
