Калінковіч: у Вярхоўны Суд не паступала скаргаў у сувязі з прэзідэнцкімі выбарамі

9 студзеня, Мінск /Кар. БЕЛТА/. У Вярхоўны Суд не паступала скаргаў у сувязі з прэзідэнцкімі выбарамі. Аб гэтым заявіў журналістам першы намеснік старшыні Вярхоўнага Суда Беларусі Валерый Калінковіч, перадае карэспандэнт БЕЛТА.

"У кампетэнцыі судоў знаходзіцца ўрэгуляванне скаргаў і спрэчак у сферы выбарчага заканадаўства, якія датычацца асноўных момантаў правядзення выбарчай кампаніі. Пакуль такіх скаргаў у час цяперашняй выбарчай кампаніі не паступала. На наш погляд, гэта сведчыць аб дастатковай дакладнасці і зразумеласці выбарчага заканадаўства, аб даволі высокім узроўні законнасці ўсіх працэсаў у рамках выбарчай кампаніі", - сказаў Валерый Калінковіч.

Сёння прадстаўнікі місіі наглядальнікаў ад СНД на выбарах Прэзідэнта Рэспублікі Беларусь сустрэліся з кіраўніцтвам Вярхоўнага Суда Беларусі. "У час сустрэчы абмяркоўваліся прыкладныя пытанні прымянення нашага выбарчага заканадаўства, роля і месца судовай кампетэнцыі ў выбарчых працэсах, а таксама практычныя пытанні ўзаемадзеяння і абмену інфармацыяй", - адзначыў Валерый Калінковіч.

Місія наглядальнікаў ад СНД пачала работу на выбарах Прэзідэнта Беларусі 18 снежня. Гэта 13-я місія па назіранні за выбарамі і рэферэндумамі ў Беларусі і 130-я - на тэрыторыі Садружнасці Незалежных Дзяржаў. Традыцыйна місія наглядальнікаў ад СНД ажыццяўляе свае функцыі строга ў адпаведнасці з беларускім заканадаўствам, паважаючы суверэнітэт дзяржавы, аб'ектыўна ацэньваючы працэс падрыхтоўкі і правядзення выбарчай кампаніі.