10 верасня, Гродна /Кар. БЕЛТА/. За любымі рашэннямі, якія прымаюцца дзяржавай, стаяць перш за ўсё людзі і жыццё нашай краіны. Аб гэтым заявіла ў час рабочай паездкі ў Гродна старшыня Савета Рэспублікі Наталля Качанава, перадае карэспандэнт БЕЛТА.
Наталля Качанава правяла сустрэчу са старшынямі гар- і райсаветаў дэпутатаў, а таксама наведала ААТ "Малочны свет", азнаёмілася з работай прадпрыемства, сустрэлася з яго калектывам. Наталля Качанава адзначыла, што на сустрэчах з дэпутатамі, работнікамі прадпрыемства ўзнімаліся розныя тэмы, што датычацца як дзейнасці Савета Рэспублікі, работы дэпутацкага корпуса ўсіх узроўняў, так і цэлым сітуацыі ў краіне.
"Такія сустрэчы даюць магчымасць даведацца аб тым, як жывуць людзі, якія ў іх ёсць пытанні да ўлады, з якімі праблемамі сутыкаюцца. Наша работа - заканатворчая дзейнасць. Пры распрацоўцы таго ці іншага законапраекта, унясенні змяненняў або дапаўненняў інфармацыю аб іх актуальнасці мы чэрпаем менавіта ад людзей. І важна разумець, што за любымі рашэннямі, якія прымаюцца, стаяць перш за ўсё людзі і ў цэлым жыццё нашай краіны", - адзначыла Наталля Качанава. Паводле яе слоў, у першую чаргу намаганні накіраваны на тое, каб працавалі прадпрыемствы, паколькі эканоміка - аснова ўсяго.
У якасці прыкладу паспяховай работы яна прывяла ААТ "Малочны свет". "Гэта высокатэхналагічнае прадпрыемства, якое развіваецца. Працуе яно кругласутачна, 7 дзён у тыдзень, выпускае запатрабаваную на ўнутраным і знешнім рынках прадукцыю. Вельмі важна, што няма ніякіх праблем з яе рэалізацыяй", - сказала Наталля Качанава. Яна падкрэсліла, што падзеі, якія адбываліся ў краіне, на работу прадпрыемства не паўплывалі. І партнёры па бізнесе ацанілі гэта станоўча. Яны званілі, цікавіліся, што адбываецца, але цяпер пытанняў у іх няма, усе абавязацельствы выконваюцца.
ААТ "Малочны свет" - адзін з лідараў малочнай прамысловасці краіны. У суткі тут перапрацоўваецца амаль 1,5 тыс. т малака. Стаўка ў рабоце зроблена на тэхнічнае пераўзбраенне, што дае магчымасць павялічваць магутнасці па перапрацоўцы, пашыраць асартымент, паляпшаць якасць прадукцыі, рабіць яе больш канкурэнтаздольнай. Цяпер на прадпрыемстве выпускаюць больш за 300 відаў разнастайнай малочнай прадукцыі. Прычым 66 працэнтаў пастаўляецца на экспарт. Прадукцыя прадстаўлена на рынках Расіі і Кітая, пастаўляецца ў ААЭ, В'етнам і Філіпіны, а таксама іншыя краіны. На прадпрыемстве амаль 2 тыс. супрацоўнікаў.-0-
