29 снежня, Мінск /Кар. БЕЛТА/. Старшыня Савета Рэспублікі Наталля Качанава сёння сустрэлася з загадчыкамі ўстаноў дашкольнай адукацыі Мінска, перадае карэспандэнт БЕЛТА.
"Мы дамовіліся аб тым, што гатовы прымаць у Савеце Рэспублікі тых, хто пажадае з намі сустрэцца. І ўвогуле мы заўсёды рады сустрэчам. Таму што гэта магчымасць паразмаўляць, пачуць адзін аднаго. А для нас вельмі важна, каб даведаліся пра работу Савета Рэспублікі як можна больш людзей, - сказала Наталля Качанава. - Сёння мы былі ў сацыяльна-педагагічным цэнтры Ленінскага раёна. Я, вядома, даўно знаёма з работай гэтых устаноў. І сёння чарговы раз зразумела, што мы павінны абавязкова сустракацца з гэтымі хлопчыкамі і дзяўчынкамі. Мы дамовіліся, што літаральна ў студзені збяром старэйшых дзяцей і абавязкова запросім да нас у Савет Рэспублікі. Таму што гэтыя хлопцы і дзяўчаты павінны разумець, што ў жыцці ёсць людзі, якія заўсёды гатовы ім дапамагчы".
Паводле слоў спікера, вельмі важны размовы, сустрэчы з людзьмі ў калектывах, на прадпрыемствах, у арганізацыях. "Мы выкарыстоўваем усе формы і метады работы з людзьмі, таму што нам важна, каб усё, што мы пачуем, што ў самых розных сферах жыццядзейнасці нашай краіны для сябе абазначым, было рэалізавана ў тых нарматыўных, прававых, заканадаўчых актах, над якімі ў далейшым нам давядзецца працаваць. А недзе і з ініцыятывамі выступаць. Таму што свет змяняецца і вельмі дынамічны, таму нам даводзіцца выходзіць з ініцыятывамі, - адзначыла яна. - Паглядзіце, якая сёння сітуацыя ў свеце. Мы павінны працаваць на апярэджанне, прымаючы тыя законы, якія патрэбны сёння нашай краіне і людзям. І калі мы працавалі над новым праектам змяненняў і дапаўненняў Канстытуцыі, то ў сваёй рабоце выкарыстоўвалі і тое, аб чым гаварылі людзі".
Старшыня Савета Рэспублікі падкрэсліла, што Беларусь была і застаецца сацыяльна арыентаванай дзяржавай. "І вы ведаеце, якую ўвагу наш Прэзідэнт удзяляе сістэме адукацыі, ахове здароўя, сацыяльным напрамкам. Прыярытэт нашай палітыкі - гэта людзі. Мы кожны раз ставімся з увагай да таго, аб чым гавораць людзі ў плане сацыяльных напрамкаў. Для нас усё гэта важна. Таму што наша краіна - гэта прававая дзяржава. Мы жывём па Канстытуцыі, і Беларусь развіваецца ў адпаведнасці з заканадаўчымі актамі, якія прыняты ў нашай краіне. Жыццё паказвае, што гэта абсалютна правільныя падыходы", - расказала Наталля Качанава.
Спікер адзначыла, што з вялікай павагай ставіцца да людзей, якія працуюць у сістэме адукацыі, у дашкольных установах, сацыяльна-педагагічных цэнтрах, дзіцячых дамах. "Выхоўваць дзяцей заўсёды няпроста, калі ў сям'і іх некалькі, не гаворачы ўжо пра цэлыя дзіцячыя калектывы. Мы разумеем, што гэта праца вельмі цяжкая. Але ад вас шмат у чым залежыць будучыня нашай краіны. Калі малады чалавек на сваім шляху сустрэне добрага педагога, выкладчыка - яму па жыцці гэта дапаможа. У гэтым няма ніякага сумнення. Я хацела б вам падзякаваць за вашу работу. Я проста ўпэўнена, усё, што ад вас залежыць, вы робіце на сваім месцы", - адзначыла яна.
Наталля Качанава акцэнтавала ўвагу: вельмі няпростая сітуацыя складваецца вакол Беларусі. "Настолькі дакладна выбудавана сістэма разбурэння нашай краіны. Вядома, выстаяць у гэтай сітуацыі і захаваць эканоміку - не проста. Пандэмія, санкцыі супраць нашай краіны, а эканоміка разам з тым прырастае, і мы бачым добрыя вынікі. Усё, што адбываецца ў тваёй краіне і што будзе заўтра, і ў якой краіне мы будзем жыць - гэта ўсё залежыць ад нас. Будучыня нашай краіны залежыць ад кожнага з нас. Калі мы будзем гэта разумець і цаніць, то вынік будзе хутчэй і эфектыўней, - дапоўніла яна. - Для кожнага чалавека важна, каб быў мір у краіне. Паглядзіце, усе сацыяльныя праекты і праграмы, якія ўзяла на сябе дзяржава, выконваюцца. Ніводная ж праграма не закрыта. Усё ў планавым парадку вырашаецца. Пенсіі, дапамогі выплачваюцца. У нас шматдзетных сем'яў у 2014 годзе было 77 тыс., сёння ўжо 120 тыс. Гэта дзякуючы тым праграмам, якія працуюць у нашай краіне".
Спікер упэўнена, трэба гаварыць пра сямейныя каштоўнасці не толькі з моладдзю, але і з дзецьмі. "Трэба гаварыць пра сям'ю. Тое, што сёння прапаведуюць заходнія краіны - гэта не наша культура, не наш менталітэт. У школе пра гэта ўжо позна гаварыць. У дзіцячым садзе гаварыць трэба, што мама, тата павінны быць, павага адзін да другога. Тыя каштоўнасці, якія сёння навязвае Захад, - гэта шлях у нікуды, гэта не нашы падыходы. І нашы традыцыі павінны быць нашымі. Таму, калі мы працавалі над праектам Канстытуцыі, мы замацавалі там, што шлюб - гэта саюз паміж мужчынам і жанчынай. І ўсе гэта падтрымалі. Хто б мог падумаць, што гэта будзе трэба заканадаўча прапісваць? Гэтак жа, як усе падтрымалі прапанову, што памяць пра Вялікую Айчынную вайну непарушная і свяшчэнная. Хто б мог падумаць, што праз 80 гадоў з пачатку той страшнай трагедыі ў нашай краіне мы павінны будзем прапісаць гэта ў Канстытуцыі? - канстатавала Наталля Качанава. - Асноватворнае - гэта законы і адзінства ўсіх нас. Лепш за нашу краіну няма. Мы павінны зберагчы ўсё, што заваявана старэйшымі пакаленнямі і што мы стваралі сваёй працай за гэтыя гады. А было зроблена нямала. На вас ускладзена асаблівая місія. Вы павінны зрабіць усё, каб маленькія дзеткі разумелі, што яны жывуць у краіне, у якой іх любяць. Што гэта краіна добрая, што тут усё нацэлена на стварэнне".-0-
