30 кастрычніка, Мінск /Кар. БЕЛТА/. Сірыя для Беларусі - гэта надзейны сябар і партнёр на Блізкім Усходзе, заявіла старшыня Савета Рэспублікі Наталля Качанава на сустрэчы з міністрам замежных спраў і па справах экспатрыянтаў Сірыйскай Арабскай Рэспублікі Басамам Сабагам, перадае карэспандэнт БЕЛТА.
"Сірыя для Беларусі - гэта надзейны сябар і партнёр на Блізкім Усходзе. Супрацоўніцтва паміж нашымі краінамі ў многім складваецца дзякуючы добрым адносінам паміж прэзідэнтамі нашых краін, - сказала Наталля Качанава. - Мы з вялікай радасцю адзначаем наша ўзаемадзеянне ў Арганізацыі Аб'яднаных Нацый, на іншых міжнародных пляцоўках. У нас з вамі падобныя падыходы ў палітыцы, якая праводзіцца ў нашых дзяржавах. У знешняй палітыцы - гэта суверэнітэт, незалежнасць, неўмяшанне ва ўнутраныя справы іншых краін, тэрытарыяльная цэласнасць. Мы ўдзячны вам за падтрымку нашай краіны па многіх адчувальных пытаннях у міжнародных арганізацыях. Гэтак жа, як і мы заўсёды падтрымлівалі Сірыю і сірыйскі народ у імкненнях жыць на сваёй зямлі, у пытаннях светаўладкавання і парадку, тэрытарыяльнай цэласнасці і недапушчальнасці санкцыйнага націску, які і ваша, і наша краіна зведалі на сабе ў поўнай меры".
Спікер адзначыла, што ў Беларусі ўважліва сочаць за развіццём канфлікту на Блізкім Усходзе. "Калі гінуць мірныя жыхары, дзеці - гэта, вядома, страшна. Мы са свайго боку неаднаразова прымалі заявы, якія накіроўваліся ва ўсе міжнародныя арганізацыі, аб неабходнасці спыніць эскалацыю на Блізкім Усходзе і вырашыць гэты канфлікт мірным шляхам. Мы разумеем, што гэта няпроста, аб гэтым гаварыў наш Прэзідэнт Аляксандр Лукашэнка на саміце БРІКС, але гэта адзіна правільны шлях урэгулявання канфлікту", - падкрэсліла старшыня Савета Рэспублікі.
Беларускі народ, як ніхто іншы, разумее важнасць міру на зямлі. "У гэтым годзе мы адзначалі 80-годдзе вызвалення нашай краіны ад нямецка-фашысцкіх захопнікаў, у наступным годзе будзем адзначаць 80-годдзе Вялікай Перамогі. Беларускі народ шмат нацярпеўся. Мы бачылі, што такое вайна, таму прынялі законы аб генацыдзе беларускага народа і недапушчальнасці рэабілітацыі нацызму. І мы заўсёды будзем усяляк падтрымліваць міралюбівыя імкненні любой краіны. Мы шчыра жадаем, каб на Блізкім Усходзе быў мір і спакой", - дадала Наталля Качанава.-0-
Фота Сяргея Шэлега
Падпісвайцеся на нас у
