19 верасня, Мінск /Кар. БЕЛТА/. Мірныя і стваральныя ініцыятывы Беларусі не абмяжоўваюцца ўнутрыдзяржаўным жыццём, а датычацца будучыні рэгіёна, кантынента і глабальнага развіцця. Аб гэтым заявіла старшыня Савета Рэспублікі Наталля Качанава на адкрыцці адзінаццатай сесіі Савета Рэспублікі сёмага склікання, перадае карэспандэнт БЕЛТА.
"Сёння - значная падзея ў нашай парламенцкай дзейнасці і жыцці кожнага з нас. Пачынае сваю работу адзінаццатая сесія Савета Рэспублікі Нацыянальнага сходу Рэспублікі Беларусь, заключная для сёмага склікання. Нас чакае яшчэ вельмі шмат важных спраў, і разам з тым ужо могуць быць падведзены пэўныя вынікі нашай сумеснай работы, - сказала Наталля Качанава. - Безумоўна, час выбраў нас. Гэта скліканне прыпадае на асаблівы перыяд сучаснай гісторыі не толькі для Рэспублікі Беларусь, беларускай дзяржаўнасці, але і ў цэлым гісторыі развіцця чалавечай цывілізацыі, гісторыі свету. І тое, аб чым яшчэ некалькі гадоў таму ўсіх прадбачліва папярэджваў наш Прэзідэнт, сёння мы назіраем на свае вочы. Геапалітычны падзел свету. Маштабны, сістэмны крызіс, сімптомы якога відавочны ўсім нам. І не толькі ў ваенна-палітычнай, але і ў эканамічнай, гуманітарнай сферах".
Нарастаюць рознагалоссі паміж асноўнымі цэнтрамі сілы і міжблокавае процістаянне. "Удасканальваюцца формы і метады вядзення войнаў і ваенных канфліктаў, распаўсюджана гібрыднае ўздзеянне на праціўніка, характар і маштаб якога пастаянна мяняюцца. Актыўна прымяняюцца тэхналогіі "разумнай сілы" для рэалізацыі каляровых рэвалюцый. У выніку перадзелу сфер уплыву і наступстваў беспрэцэдэнтнага санкцыйнага націску ўзмацняецца няўстойлівасць сусветнай эканомікі", - адзначыла спікер.
"Нормы і прынцыпы міжнароднага права сталі падмяняцца інструментамі палітычнага і эканамічнага націску, ваеннага і інфармацыйнага шантажу, дыскрымінацыяй па моўнай, рэлігійнай, нацыянальнай і іншых прыкметах. Месца дыпламатыі ўсё больш займае палітыка санкцый. Разбураецца архітэктура міжнароднай бяспекі, ігнаруюцца ключавыя міжнародныя дагаворы і пагадненні па пытаннях раззбраення і кантролю над узбраеннямі, - дапоўніла старшыня Савета Рэспублікі. - У цэлым сітуацыя і перспектывы яе развіцця - у высокай ступені няпэўнасці. Наступствы - цяжка прагназуемыя. Але бясспрэчна адно - яшчэ ніколі чалавецтва не было настолькі блізка да трэцяй сусветнай вайны. І калі дойдзе да прымянення ядзернай зброі - пераможцаў у гэтай вайне не будзе. Прайграюць усе".
"Бачыцца сімвалічным, што адкрыццё адзінаццатай сесіі Савета Рэспублікі праходзіць адразу пасля нашага дзяржаўнага свята - Дня народнага адзінства і напярэдадні Міжнароднага дня міру, заснаванага Генеральнай Асамблеяй Арганізацыі Аб'яднаных Нацый як дзень адмовы ад насілля і спынення агню. І ўсё гэта - у 2023 годзе, аб'яўленым у Беларусі Годам міру і стварэння, што не толькі вызначае накіраванасць нашай работы ў маючую адбыцца сесію, але і абсалютна адпавядае агульнаму духу палітычнай, дзяржаўнай і грамадскай дзейнасці ў нашай краіне, - адзначыла Наталля Качанава. - Як справядліва падкрэсліў кіраўнік дзяржавы ў сваім выступленні на патрыятычным форуме "Мы - беларусы!": нам не трэба расказваць, як важна жыць у міры і згодзе, быць адзінай нацыяй. Жыццё навучыла нас. Мы нязменна ажыццяўляем сваю гістарычную місію - садзейнічаем мірнаму суіснаванню ўсіх членаў міжнароднай супольнасці, дээскалацыі існуючых канфліктаў, увасабляем у жыццё прынцып узаемнай падтрымкі дзяржаў у барацьбе з выклікамі часу".
У гэтым корань нашай міралюбнасці і добрасуседства, якія з'яўляюцца характэрнай рысай беларускага народа, вызначаюць палітыку суверэннай Беларусі і прыярытэты парламенцкай дзейнасці ў тым ліку. "Парадак дня Савета Рэспублікі - не рэакцыя і рэфлексія на тое, што адбываецца, а выпрацоўка сярэдне- і доўгатэрміновай стратэгіі. Прычым нашы мірныя і стваральныя ініцыятывы не абмяжоўваюцца ўнутрыдзяржаўным жыццём, а датычацца будучыні рэгіёна, кантынента і глабальнага развіцця", - канстатавала спікер.-0-
