15 чэрвеня, Мінск /Кар. БЕЛТА/. Выязное пашыранае пасяджэнне Прэзідыума верхняй палаты парламента пад старшынствам кіраўніка Савета Рэспублікі Наталлі Качанавай прайшло 14 чэрвеня на базе 120-й асобнай гвардзейскай механізаванай Рагачоўскай Чырванасцяжнай ордэнаў Суворава і Кутузава II супені брыгады імя Вярхоўнага Савета Беларускай ССР (вайсковая часць 04147), перадае карэспандэнт БЕЛТА.
Перад пасяджэннем сенатары азнаёміліся з умовамі службы, наведалі вучэбныя карпусы і казармы, агледзелі асноўныя ўзоры ўзбраенняў, ваеннай і спецыяльнай тэхнікі, формы і стралковай зброі. У Пакоі баявой славы госці даведаліся пра слаўны баявы шлях брыгады. Экскурсіі з бліжэйшых школ сюды прыводзяць пастаянна: з пачатку бягучага года ў міні-музеі пабывалі каля 1,5 тыс. хлопчыкаў і дзяўчынак. На думку Наталлі Качанавай, гэта вельмі важны элемент патрыятычнага выхавання, патэнцыял Пакоя баявой славы трэба выкарыстоўваць і далей па максімуму. "Выхоўваць трэба пачынаць ужо з дзіцячага сада", - лічыць кіраўнік Савета Рэспублікі.
На пасяджэнні Прэзідыума яго ўдзельнікі шукалі шляхі ўдасканалення падрыхтоўкі прызыўнікоў да службы ва Узброеных Сілах з улікам сучасных выклікаў і пагроз. Паводле слоў Наталлі Качанавай, розным дзяржаўным органам у комплексе неабходна вырашаць задачы падрыхтоўкі моладзі да службы ў арміі: якая работа праводзіцца ў школах, якія ўмовы падрыхтоўкі прызыўнікоў, у тым ліку маральнай і фізічнай, да воінскай службы, як забяспечваецца прапаганда здаровага ладу жыцця. І асабліва важна разумець, наколькі самі маладыя людзі сёння ўсведамляюць, што абарона Радзімы - гэта рэальная задача, доўг, асабліва калі ў свеце неспакойна. Таму што пакуль ёсць прабелы ў гэтай рабоце, хоць і выбудавана эфектыўная сістэма, падкрэсліла Наталля Качанава.
"Гэта сур'ёзнае пытанне, да якога мы ўсе павінны ставіцца неабыякава. У гэтай рабоце не павінна быць фармалізму. Сумленна, адкрыта, прыстойна, - сказала Наталля Качанава. - Наша задача - разам зрабіць усё магчымае, каб маладое пакаленне разумела: ніхто не абароніць краіну, яе незалежнасць, мір, акрамя іх саміх. Гэта не высакамоўныя словы. У армію павінны прыйсці маральна падрыхтаваныя, фізічна моцныя хлопцы. Усе павінны разумець, што будучыня нашай краіны залежыць ад нас".
Як адзначыў міністр абароны Віктар Хрэнін, у мірны час беларуская армія на 65 працэнтаў кантрактная. І далёка не толькі кантрактнікі ў выпадку неабходнасці павінны адстойваць свабоду і незалежнасць краіны, у тым ліку са зброяй у руках. У гэтым, між іншым, заключаецца патрыятызм. А паколькі далёка не кожны малады чалавек прызыўнога ўзросту ў выніку праходзіць службу ў арміі, нелагічна ўскладаць толькі на Узброеныя Сілы задачу патрыятычнага выхавання.
"Многія выкладчыкі па прадмеце "Дапрызыўная падрыхтоўка" ў школе не маюць ўяўлення пра воінскую службу", - абазначыў яшчэ адзін праблемны момант міністр. У якасці рашэння прапанавана абучэнне і павышэнне кваліфікацыі такіх настаўнікаў, прыцягненне кадравых ваенных да арганізацыі падрыхтоўкі школьнікаў, уведзена новая пасада - намесніка кіраўніка па патрыятычным выхаванні. Распрацавана праграма патрыятычнага выхавання насельніцтва, рыхтуецца да стварэння Рэспубліканскі цэнтр патрыятычнага выхавання пад патранатам Міністэрства абароны. Гэта трэба, каб моладзь усведамляла свой абавязак перад Айчынай і не думала, што служба ў арміі - гэта страта часу. Акрамя таго, гэта магчымасць набыць воінскую спецыяльнасць, выхаваць у сабе якасці сапраўднага мужчыны і грамадзяніна.
Міністр аховы здароўя Дзмітрый Піневіч адзначыў: патрабаванні да стану здароўя прызыўнікоў былі зніжаны (але так, каб не пацярпела абараназдольнасць арміі). Нават пры гэтым у 2020 годзе працэнт прызнаных непрыдатнымі да службы знізіўся ненамнога і склаў 19,8 працэнта. Асноўныя прычыны: прыроджаныя анамаліі, праблемы з пазваночнікам, сардэчна-сасудзістай сістэмай. Шмат маладых людзей са скаліёзам, бранхіяльнай астмай, цукровым дыябетам. Многія праблемы развіваюцца ў школе: з першай групай здароўя яе заканчаюць толькі 10 працэнтаў дзяцей, з другой - 70 працэнтаў. Таму прыхільнасць да здароўезберагальных паводзін сёння - актуальны выклік.
Вельмі шмат задач у сувязі з гэтым кладзецца на школу. Паводле слоў міністра адукацыі Ігара Карпенкі, у свой час трансфармацыі ў сістэме адукацыі прывялі да таго, што яна пачала ператварацца ў сферу паслуг. Але ў нашай дзяржаве гэта, перш за ўсё, інстытут сацыялізацыі, і выхаваўчая работа павінна быць укаранёна ў навучальны працэс. Рэгулярна арганізуюцца ваенна-патрыятычныя лагеры і змены для дзяцей, вядома, сумесна з Мінабароны.
Таксама стаіць задача, каб педагагічныя кадры фарміраваліся не па астаткавым прынцыпе. Для гэтага ўкаранёны ў школе педкласы. Першы выпуск з іх толькі ў гэтым годзе, гэта значыць вынікі яшчэ наперадзе.
"З 1 верасня бягучага года ўводзіцца пасада кіраўніка ваенна-патрыятычнага выхавання ў школах - усяго каля 2 тыс. ставак", - дадаў Ігар Карпенка. Наконт спецыялістаў па лячэбнай фізкультуры ва ўстановах адукацыі ён адзначыў, што трэба яшчэ разгледзець, як гэта арганізаваць, асабліва ў малакамплектных школах.
Наконт барацьбы з ухіленнем ад выканання воінскага абавязку выказаўся часова выконваючы абавязкі міністра ўнутраных спраў Юрый Назаранка. Паводле яго слоў, у бягучым годзе ад ваенных камісараў у органы ўнутраных спраў паступіла каля 5 тыс. зваротаў па ўхіленні і 3 тыс. - аб прыводзе прызыўнікоў па адміністрацыйнай справе. МУС і Следчым камітэтам прапрацавана прапанова аб магчымасці ўзбуджаць крымінальную справу ў выпадку адсутнасці прызыўніка ў краіне, каб, выконваючы Крымінальна-працэсуальны кодэкс, мець магчымасць атрымліваць садзейнічанне органаў у іншых краінах. Калі ў маладога чалавека акажацца аб'ектыўная прычына для адтэрміноўкі, крымінальная справа не будзе мець прадаўжэння.-0-
Фота Аксаны Манчук
