Фота Савета Рэспублікі
31 мая, Мінск /Кар. БЕЛТА/. Завяршыўся афіцыйны візіт парламенцкай дэлегацыі Рэспублікі Беларусь на чале са старшынёй Савета Рэспублікі Наталляй Качанавай у Кітайскую Народную Рэспубліку. У аэрапорце афіцыйную дэлегацыю праводзіў выканаўчы намеснік старшыні Камітэта высокага ўзроўню кітайскага боку Хуан Мін, паведамляе карэспандэнт БЕЛТА.
Праграма візіту была шырокай і насычанай. Адбыліся сустрэчы з намеснікам старшыні Кітайскай Народнай Рэспублікі Хань Чжэнем, старшынёй Пастаяннага камітэта Усекітайскага сходу народных прадстаўнікоў Чжаа Лэцзі, старшынёй Усекітайскай федэрацыі жанчын Шэнь Іцынь, прайшло першае пасяджэнне Камітэта высокага ўзроўню па супрацоўніцтве паміж заканадаўчымі органамі Рэспублікі Беларусь і Кітайскай Народнай Рэспублікі. Акрамя таго, беларускія парламентарыі наведалі аб'екты сацыяльнай інфраструктуры Пекіна.
"Я буду дакладваць Прэзідэнту нашай краіны аб выніках візіту. Я ўпэўнена, што сустрэчы, якія прайшлі, нададуць новы імпульс яшчэ большаму супрацоўніцтву паміж нашымі краінамі. Нас, парламентарыяў, гэта зблізіць, і мы будзем працаваць разам", - сказала Наталля Качанава.
Паводле слоў спікера, у Беларусі і Кітая абсалютна падобныя падыходы. "Знешняя палітыка і палітыка ўнутры краін абсалютна падобныя. Гэта перш за ўсё людзі, іх дабрабыт, павышэнне іх дастатку. У нашага Прэзідэнта самае галоўнае - народ. Гэта мы бачым і ў Кітаі, - падкрэсліла прадстаўнік Савета Рэспублікі. - Што датычыцца знешняй палітыкі - мы заўсёды падтрымлівалі Кітай, усе ініцыятывы, якія ён вылучае. Мы падтрымліваем ваша імкненне быць адзіным Кітаем".
Беларусь - міралюбівая краіна, канстатавала Наталля Качанава. "Мы толькі за мір і супрацоўніцтва. Мы не хочам ніякіх канфрантацый, канфліктаў. Мы разумеем, што сёння самае галоўнае - захаваць мір і стабільнасць на сваёй зямлі. Таму што мы ў поўнай меры на сабе адчуваем усе працэсы, якія адбываюцца. Цяпер вакол нашых граніц адбываюцца страшныя падзеі. І мы робім усё, каб забяспечыць мір і стабільнасць у сваёй краіне", - дадала спікер.-0-
Фота Савета Рэспублікі
